Column Tonko Ufkes, column, goed lek

Gepubliceerd op 18 april 2016 | door Jan Glas

0

‘Zunder’ column van Tonko Ufkes

Zunder

Ik moet echt wat doen, met e handen.
Tot gusteroavend wol ik vandoag gewoon mien gaang goan, dat harren Tine en ik soamen bedocht; niet ien t ziekenhuus omhangen en wachten, mor thuus weden. Eerst de kraant lezen of aans n boek, met meziek der bij aan en noatied ien e tuun. n Best stuk omspitten en dat kloar moaken veur de vroege eerappels. Misschien tegen haalf elf bij Hoekstra’s kovviedrinken en dan boodschappen doen. Want met e tillefoon ien e buus ben k hieltied beriekboar en kin k toch gewoon mien gaang goan.
Eefkes vuul ik met e vlakke haand of k het ding bij me heb en hoal t dan toch teveurschien. t Wiest nog mor negen uur. Veur de zoveulste moal reken ik de tieden uut: domt wordt Tine kloarmoakt, om tien uur is ze aan e beurt, t opereren duurt tot elf, hooguut haalf twaalf en dan noar de uutsloapkoamer. En as t bezuukuur om drie begunt, is ze vast weer n hiele vraauw. Zo zel het goan.
Ien n moandagkraant stijt nooit veul nijs en t leesboek lijt nog boven ien e slopkoamer. Gusteroavend kon k doar gien begun aan kriegen, nee, ik goa òfwassen en dan stofzoegen, dat liekt me veul beter toe. Het huus moet op orde weden as Tine met n dag of wat weer thuuskomt, dat moet eerst. Lezen komt loater wel.
Gelukkeg wiet ik ieneent wat of ik moet en k schoef het Gruune Kruus-berre van e muur noar t grote roam en hoal de bloempotten uut e vensterbaank. Veurzichteg leg k mien kop op t kussen, mor vernem dat t uutzicht niet goed is. Der helpt niks aan en k moak het berre vannijs op, nou met t heufdènde noar d’aander kaant. Nog n keer perbeer ik t en nou is t beter: Tine kin straks de hiele tuun zien, tot achtern aan toe, tot e singel en e verre bosraand!
t Klopt niet hielemoal, de kastanjeboom stijt der wat veur, die heb ik joaren leden ienderdoad verkeerd poot. Die stijt te dicht bij t huus. Dat wis ik eileks wel, mor och, t is nou n mooie boom en hij is ientied te groot worden om te verpoten. Aander moal goa k met mien kop op t kussen en kiek noar boeten. Ik hol e kop doar en goa hielemoal op t berre leggen, op e deken.
Duudlek, die boom moet doar vot.
Ik hoast me noar boven, noar de slopkoamer en trek de goeie trui en boksem uut. De tillefoon nem k ien e haand – vief veur tien wiest er – en ik stop het ding terug, dan gijt er niet stuk onder t waark. Beneden ien e bijkeuken doe k de olde kleren aan die doar hangen en de overall der overhìn.
Even loater heb ik t neudege gereedschap; de beugelzoag, de haandzoag, de takkescheer en goa k aan de slag. Met geliekmoatege hoalen verdwient het zoagblad ien e stam en t eerste geluud overstemt al mien denken.
Overstemt alles.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

4 × 3 =

Terug naar boven ↑
  • Literatuur activiteiten

    Geen nieuwe activiteiten