Column Jan de Jong, column

Gepubliceerd op 13 mei 2015 | door Webloug

0

‘Zulf redden’ column van Jan de Jong

Zulf redden

‘Eerst vroagen of e koks of artikel ainendatteg is. Is t joa! Verzoepen loaten.’

t Nije swembad nait op zundag lös. n Hail dörp ien hokken.
Grode minsen. k Heurde aal doag niks aans.

Ik stoar deur n dik glaas. Hier en doar is t aan boetenkaant wat besloagen en begleerd. Òfswemmen leutjekes.
Moekes drukken neus aan t glaas. Opa’s mit handen ien buus en oma’s verfrummeln buusdoukjes.
t Is n strenge, narregge badmeester volgens moekes. Gonnent mouten vernijs n end doeken onder wotter. Badjuf strikt n poar deur t hoar.

Wat heb k n gloependste hekel aan swemmen. Op Mulo eerst t overdekt instructiebad ien sportles. Dou noar t daipe openluchtbad. Ik kwam nait wieder as t ondaipe.

Onder dainst was k de bok. Noa anderhaalf uur achter ien n stinkende drij-tunner op n vrijdagmörgen zes uur eerste moal ien t swembad kwam vroag van ‘wel kin der nait swemmen’, deur sportinstructeur.
‘Ikke nait.’
Noa dij les kon k swemmen.

Eerste moal, noa n week zaikenhoes en n week thoes van blindedaarmoperoatsie haar hai gain meedlieden.
‘Kistjes, overaal, koppel en n geweer oet t hok pakken. Doe bist d’ainege nog.’ Instructeur was onverbiddelk. Dou wees e noar doekplaank. Doar eerst òf en noar verste houk swemmen. t Geweer dreug holden.
t Was nog nait doan en kwam nog meer achter aan.

Kiender kommen aan t glaas kieken en swaaien. Moekes moaken dat zai noar klaidhokken kommen.

Eefkes loater binnen eerste blaauwsnoetjes mit hier en doar n drup aan neus aankled.
Drok en bibbern nog wat wichtjes noa. Opa’s kloppen op scholdertjes en oma’s snoeven. ‘Geweldeg.’
Kantine vult hom langsoam mit frituurlucht.
‘Bliede dat hai hom hoald het,’ zegt n moeke.
‘Aans ik wel,’ n aander. ‘Zodderdagmörgen mooi vernijs oetsloapen.’
‘Ook wel makkelk,’ wait ain. ‘Mooi op tied bosschoppen doun. Lekker rusteg.’
‘Mor nou kinnen zai heur zulf redden!’

Op toavel zai ik n kraant. Veurkaant n foto. n Rubberboot.
Moekes mit grode ogen holden aarms om kiender. Drieven al gonnent ien t wotter.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

vijf × twee =

Terug naar boven ↑
  • Literatuur activiteiten

    Geen nieuwe activiteiten