Column Jan de Jong, column

Gepubliceerd op 3 oktober 2017 | door Webloug

1

‘Zuit bloud’ column van Jan de Jong

Zuit bloud

Ik bin der kloar mit. Zummer. En no haildaal.
‘Horren,’ zee vraauw, ‘moak dij der mor veur.’
Zeg dat mor ais haardop, veur joezulf. Horren! t Woord allinneg al. De griezel lopt joe over de graauwel.
En nog zukkent. Klàmbóé!
Trillend, noar oam sloekend op raand van bèr, mit dik broes stief veur de kop kreeg vraauw mie hom om haals vot en kon k baaide aarms ook weer bruken. k Heb hom ien ain hoal omdeel ropt van t plefon. Zel ik mie doar naachts verwurgen loaten?
Verinneweerde nachten. Dat geluud, van ien ainen stil weden. Luustern, ogen woagenwied lös.
t Baalkeduustern zicht. t Licht, dat nait aan mag. Aans bromt ter nog ain.
En aanderdoags smörgens hail sloapkoamer op kop. Mit n dikke toet op lip, n dicht oog en t oor wel vief moal zo groot, gloependeglìn en zo strak ien t vèl dat mie t tou tonen oet kirrelt. En naarns nait dij laangbaindermug dij mie hail nacht ien t ìnne holdt. En bie geluk hom zitten zain, noa n dikke moand zuiken. Bovenien, aan binnenkaant klamboe.

n Vìnsterbaank stief vol sitrounbloumen, n schuddeltje citronnela op t nachtkastje, n nijmoods fertuut mit n nait te heuren geluud ien t stopkontakt en deuzen paracetamols. De kop wel tien moal zo dik. En
din haar der nog nait ain mie bie oren had.
Aal vledderbozzen reud ien kontraain van wel n kilometer om hoes.
En op t lèsten, as allinneg mor t daip of overweg over blift, zo’n draaide bakstrip aan sloapkoamerlaamp. Dij waas gain laank leven beschoren. Nog gain dag, of vraauw zat ter mit t hoar ien vaastbakt. Dou k scheer kreeg was k nog nait joareg.

Mankeliek bedenk ik mie. Nait van bladjes aan bomen, of as zai der òf valen. Nee, van zummer.
En no heb k t allinneg nog mor over neefkes. Wat dochten ie van aal dij swaarte en greune muggen.
Nee, n flitspuit mit DDT en vlido boxen of strips. Dat waarkte nog ais. Zo’n box op sloapkoamerkaast en hom aalgedureg n stukje wieder lösschoeven. Of zo’n strip aarnswoar hìn hangen. Meroakel. Ze villen staail oet lucht. Pielemottje.
Gewoon n luddek beetje zenuwgas.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , , , ,



One Response to ‘Zuit bloud’ column van Jan de Jong

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

2 × 3 =

Terug naar boven ↑
  • Literatuur activiteiten

    Geen nieuwe activiteiten