Column Zomor n zummeroavend in Troapel, column, Eddy de Jonge

Gepubliceerd op 6 juli 2015 | door Webloug

0

‘Zomor n zummeroavend in Troapel’ column van Eddy de Jonge

Zomor n zummeroavend in Troapel

Zotterdagoavend was ik veur t eerst in joaren weer in Troapel. In t Boschhuus, veur de 60ste verjoardag van Alex Vissering. Aalmoal bekinden uut de joaren zeuventeg. Mit Alex en aander jongen hevve in dij tied in n bult bandjes speuld. Rolling Stones enzo noadoun. In ’74 en ’75 speulde ik in PRENH. De gekste bandnoam dij k kin, vuld mit de vief eerste letters van de leden van de band. De E was ik dus en t is dudelk dat Alex hier nait bie zat. En noa drij moand wazzen der ook al twije vervangen. De H hangt der n beetje bie, dij haar ook op n aander plek stoan kinnen, noa de P of misschien noa de E. De H was aigenlieks mien muzikoale vrund, Herman Schür, onze slaggitarist. Doar trok ik in dij tied veul mit op. Wie repeteerden op zolder van t postkantoor in Muzzelknoal, woar ik mit mien ollu n tiedlaank woonde. Herman mos der haard veur waarken net as ik. t Kwam ons nait aanwaaien. Herman haar ook nog ais grode handen en veur sommege gitaargrepen is t handeg dast wat smallere vingers hest. Herman kon op den duur, noa veul uutperbaren, mit twij vingers ingewikkelde akkoorden griepen. Hij haar n prachtege hemelsblauwe Fender Stratocaster. n Fantastisch instrument. En Herman was gek op Lynyrd Skynyrd, gitaarrock van de bovenste plaank. Herman was ook technisch en wos veuraal veul òf van auto’s, van biezundere olle modellen. k Zai hom nog rieden in zo’n klaaine gruine MG (zunder deurkrukke). De leste joaren speulde hij in de bluesrock band Tokkel, noar ik heurd haar mit n joaren zeuventeg repertoire, net as vrouger. En dou zotterdagoavend in t Boschhuus zegt aine tegen mie: waist wel dat Herman overleden is. Veur mie ston alles even stil. Hermantje overleden? Nee ik wos dat nait en al in maai 2014! Zo kist minsen dus uut zicht roaken.

Foto: PRENH. Daarde van rechts Herman Schür

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

twaalf − 11 =

Terug naar boven ↑
  • Literatuur activiteiten

    Geen nieuwe activiteiten