Column Jan de Jong, column

Gepubliceerd op 27 mei 2015 | door Webloug

0

‘Zo makkelk’ column van Jan de Jong

Zo makkelk

Voutje veur voutje schoft e over stoep. Broengeel blokte pantovvels. Hakken plattrapt. Veurkaant tonen geel, mit pluusters. Bie t fietspad tikt e mit stok n blikje aan kaant en hangt hom weer aan rollator. Din stekt e over en wupt hom stoep op, stoef bie n opritje.
Hai mout even stoan blieven. Oetpoesten. Stoaren ien n leeg körfke.

Ik kiek nog ais goud. Baaide hakken stoan noast pantovvels. Bie ain is t krekt of toon boudel aan boetenkaant ais beder bekieken wil.

Dat is n zet leden, dat k zukkent haar. Lekkere waarme vouten. Mainsttied n Sunnerkloaskedo. En vraauw haitied jeuzeln en jammern. Swaitvouten.

Niks van te roeken. Al mozzen pa zienent dou voak n moal ien boeten aan n spieker of op wasrik tegen t schuurtje.

Ons katten wazzen der gek op. Kopkes geven en kroelen. Mien lèsten binnen verpist. t Was geliek doan.

Bie pinautomaten ien t winkelcentrum kikt e van linker noar rechter en weerom. Schoft t kaarke tegen muur en vuilt aal buzen bielaangs. Trillend gaait n pasje ien gleuf.
Hai vuilt nog ais ien aal buzen en pakt din bril aan t taauwke om nek. Mit ain haand op toetsenbred glopt e over bril noar t schaarm en weerom van t schaarm noar t bred en om hom tou.

Komt n vraauw achter hom stoan.
Man trekt mit scholders en drukt op toetsen.
Vraauw wupt van ain bain op aander. ‘Ol mìnsen ook.’ Zai kikt even mit.
Ol boas begunt vernijs.
‘Zo makkelk,’ zegt vraauw wat haarder en kikt mie aan.

t Apperoat begunt te toeten. Storing staait ter.
Vraauw binzelt vot. ‘Tjongejonge!’
Man kikt mie aan.
‘Kin k joe helpen,’ vroag k.
‘Aal wat e dut, mor sinten geven ho mor,’ zegt e.
‘Hebben ie wel t goie pinautomoat?’ Ik wies noar dij dernoast. Hai kikt mie aan en nog ais van aine noar aander. Trekt scholders omhoog en kin noar beneden.

Ik druk op knop ‘opnieuw’ . Storing is vot. Klikt en klakt wat en t pasje komt weerom.
‘Hè,’ zegt ol, ‘gelukkeg.’

Ik pak zien ANBO pasje der oet.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

een + negentien =

Terug naar boven ↑
  • Literatuur activiteiten

    Geen nieuwe activiteiten