Column Jan de Jong, column

Gepubliceerd op 2 februari 2015 | door Webloug

0

‘Yvon’ column van Jan de Jong

Hai staait aanderkaant vring in n kaampke gruinlaand. Drij koien om hom tou. n Ol boas al, zo t liekt. n Alpino mit swaarte stevels en n overaal op grui. t Blaauw is aan t lief tou gruin. Binnenkaant maauwen ook. n Scheerapperoat en zaip binnen hom vremd.

‘Moi. Zai binnen oareg wies mit joe nait?’

n Kou slagt tong om n maauw en n aander zuikt ien zien buus. Zachtjes strikt e heur over kop.

‘Dat zai oareg wies mit joe binnen!’

Hai komt deur vring, gaait zitten op n knij en pakt n zulverkleureg deuske oet buus. Din kikt e mie aan. ‘Zeggen ie haitied ales twij moal?’ Vingers dij t leste op schop schoeven bie group oetmizzen doun t deuske lös en knovveln n sjekje. ‘Joa, wichter binnen gek mit mie.’

In stilte van t laand houst n kou. n Kieft en n kraai koppeltjeboideln.

‘Ik mag aan heur titten zitten.’ Hai wist achter hom. ‘En boer Geert nait. Geert. Zo hait n segebok veur t dekken. Ie kieken zeker ook.’

‘Nee.’

Koien worden ruier en bölken. Hai komt ien t ìnne en kwittjet n moal. ‘Huppa. Loat mor kommen. Even roeken. Even vuilen.’ Zien wenkbraauwen trekken kroezen. ‘Wat mekaaiert dij man. Hai zol beder waiten. Oadam het ooit n moal ien n abbel beten. Doar hebben wie no nog aal liefzere van.’ Intied lopt e noar fietskaar, pakt t melkstoultje en bindt raim om t lief. Din zet e teems op n melkbus. Mit n emmer en n soeterge lap lopt e deur vring. Aanderkaant kikt e mie nog n moal aan. ‘Kiek mor ais goud. Tochteg. Aal dij vraauwlu. En dij t pergram dut lopt veuraan.’ Hai draait hom om. ‘Kom Greta. Kom wicht. Nee! Doe nait Coba. Greta eerst.’ Din pakt e n blik. Mit zaalf. Veur titten.

(Foto © Jan Glas)

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

negen + elf =

Terug naar boven ↑
  • Literatuur activiteiten

    Geen nieuwe activiteiten