Column Tonko Ufkes, column, goed lek

Gepubliceerd op 17 oktober 2017 | door Webloug

0

‘Wottervaarf’ column van Tonko Ufkes

Wottervaarf

Ver vot klinkt het rommeln van n dunderslag en geliek zit ik rechtop. t Liekt of gieneen t vernommen het – de meesten blieven gewoon ien n kerkbaank zitten of scharrelen rusteg over de brede padden van de Sainte-Chapelle – mor ik stoef meteen noar boeten. Vremd, het regent nog niet, en t is slim drok op stroat. Ik hoast me tussen e toeristen deur, over de Pont Neuf en laangs e boekekroamkes, goa dezulfde weg as n dik uur leden want zo heb k de meeste kaans om Ria te trevven.
Ze zel der nog wel stoan, achter heur schildersezel en met uutzicht op e luchtbogen van de Notre-Dame. Wat waas ik bliede dat Ria weer schilderen wol, ok al is t dit keer schetsen met wottervaarf. Aanderhaalf, misschien twee uur leek heur genogt en doarom hemmen we òfproat dat ik heur loater op t zulfde plak ophoalen zol. En volgens mij het ze amper metkregen dat ik vot kuierde, zo aandachteg zette ze de ezel uut en hoalde t nog witte doek uut t broene pakpepier.
Dikke druppen begunnen te vallen, waarm glieren ze over mien blote scholders en aarms; ik goa laangzoamer lopen, stop dan en draai t gezicht noar boven, vuul mien wangen en veurheufd nat worden. Want ik hol hielendal niet van zo’n hiete stad, aans as Ria, die . . .
Ria.
Ria stijt niet op t plak woar ik heur achterliet en n beetje ongerust loop ik hìnneweer over de stoep, tot ik bedenk woar ze weden kin: ze is teruggoan noar t hotel of – ja dat moet host wel – ze schuult ien e kerk. Ienderdoad, vlak bij de hoofdiengaang van de Notre-Dame stijt ze, de schildersezel en e aander vaarfspullen leggen op n baank. Ik zie heur eerder as zij mij en k goa achter heur stoan.
‘Ah, madame peintre . . .’
Ria draait niet noar mij toe, mor nemt heur ien broen pepier volden schilderij van e baank en holdt het as n spiegel veur ons gezichten. Ik leg mien handen om heur waarm-natte bovenaarms en fluuster dat ze t zulf uutpakken moet. Hier. Ze knikt, het besloten dat ze t duurt.
Laangzoam slagt ze de broene flappen pepier uutzied en ik kiek allent noar Ria, om te zien of ze de ogen wel open het.

Tags: , , , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

1 × 2 =

Terug naar boven ↑
  • Literatuur activiteiten

    Geen nieuwe activiteiten