Muziek twij deuntjes, Jan Henk de groot

Gepubliceerd op 13 mei 2015 | door Jan Glas

0

Wonsdag 13 maai Jan Henk de Groot in Twij Deuntjes

t Was op dij oavend n mooi begun. Weeromme kieken doun we dizz’keer nait. Jan Henk de Groot is noar aigen zeggen ‘sikkom vatteg’. Zien nije laidjes binnen bie de tied. Ze binnen veur t pebliek hail herkenboar en goan over t echte leven van nou. In t eerst denken je bie t luustern noar zien laidjes, dij as kennelke vertelstertjes bie zetten n wonderleke loaden dragt, welke richten goan we op. Degene dij doarbie n pankloare oplözzen verwacht komt bedrogen uut. Elk het zo zien tied, mor bie Jan Henk is t of dat noeit oflopen is. Der komt aaltied weer wat achterheer woar je over noadenken mouten. Mit n uutsproak van ‘Kom der zo aan’ ontvaauwt zuk veur ons n wereld rond bèrgoanstied, dij veur d’ain aaltied wat loater is. Hai dut dat as vanzulf mit n milde zulfspot, dij ons gnivveln let. Zien schaarbe observoatsies over t doagelks gesappel van klaaine en grode minsen en heur aigenste wereldbeeld speulen zuk veur hom voak òf in zien noaste omgeven, rondomrond huus en hof. Je huiven der aiglieks nait ver noar op zuik, t ligt ironisch genogt bie de veur- of achterdeur, je huiven t allenneg mor op te pakken. t Gaait bie hom aalgedureg om dij zogenoamde leutje wereld dij aiglieks de grode wereld is. Noast zien Grunneger waark let e t laidjes schrieven in t Engels ook nait lös. Veur dizz’ keer het e ook n hail staark Engelstoaleg laid ‘Mount Sinjar’ mitnomen. Hai beschrift doarin op n milde, kritische menaaier de machtelooshaid en onbegrip dij der heerst over de genocide dij t Kalifaat in d’Arabische wereld op t heden omaans het. Ik kin allain mor zeggen as je t aan tied hebben goa der noar luustern, want t is stief de muite weerd.

Bekiek HIER de speulliest. Elke waarkdag 18:00 – 19:00 uur op Radio Noord.

(Foto: Rolf Schreuder)

Tags: ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

15 − 5 =

Terug naar boven ↑
  • Muziek activiteiten

    Geen nieuwe activiteiten