Muziek

Gepubliceerd op 10 februari 2015 | door Jan Glas

0

Woensdag Hans van der Lijke in Twij Deuntjes

Op woensdagoavend is dichter-laidjesschriever Hans van der Lijke bie ons te gast. In 2014 kreeg Hans van der Lijke op de Dag van de Grunneger Toal in Stad veur zien haile oeuvre de K. TerLaan-pries toulangd.

In t juryrapport ston aan t ènd over hom : “Hans van der Lijke is sekuur in t gebruuk van de Grunneger toal. Grunnen en t Grunnegers is veur hom t kruuspunt veur vertrek, aankomst en òfschaaid, mor hai kikt as raaizeger doarbie as vanzulf ook regelmoateg over tellerraand.”

Woensdagoavend goan we wat aan de proat over zien nije CD plannen en loaten der alvast wat van heuren. Hans, dij geboren is in Utrecht en opwozzen is in Apeldoorn en Roden, het zukzulf de Grunneger toal aigenmoakt en dat moakt hom aiglieks ongehinderd en geft hom de vrije roemte, dij je neudeg hebben om der in te experimenteren. Hai schildert mit onze toal as n dege ambachtsman mit n palet aan woorden, kleur en fleur in zien schilderkes van t leven van alledag. Asmis lopt e der ook wel ais veur vot, vot van t olde stee, mor komt aan t índ aargenswoar aaltied weerom. Bie zetten nemt e mit zien moatschoppelke observoatsies dij e in zien teksten verwaarkt, doar woar dat neudeg is ook gain blad veur de mond en draait der din nait omtou.

Hans vander Lijke, n rondtrekkende troebadoer, dij tegenwoordeg in Daam woont. en doarveur n haile zet in Veelerveen touholden het, verrast ons iedere keer weer. Veur lu dij hom sunt joar en dag volgd hebben, geldt veur zien laidjederij ook de schiere gedachte ‘Goie wien wordt aaltied beter mit de joaren’. Mit zien teksten creëert Hans van der Lijke op zien menaaier n hail aigen universum. De stroaten dij e doar bie oflopt binnen eerder aan laandskaande din aan d’Hoofdweg te vinden. Zien deurwrochte laidjes binnen bie zetten deurspekt, mit dij grode wenst noar n betere wereld. t Gemis doarvan ligt doarbie aaltied op de loer. Hans zien laidjes overstiegen doarbie aaid t anekdotische en dat schetst e din mit hail ofgewogen woorden. Hai zet t Grunnegers zotrekend in alerhaande metaforen noar zien haand.

Rood verlangst

Doar veur de wind aan speert n boot.
En meer veuraan hangt wat oet t lood n zaail
– verstaind tot wìnsteg rood verlangst zok te bewegen.
En luchten gruien blaauw en strak sums liek tot aan t hemeldak.
Hier zit gain swoan om zien gerak of zien gemak verlegen.

Speulliest Twij Deuntjes is HIER te bekieken.

(Foto © David Woltinge)

Tags: ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

negen − 2 =

Terug naar boven ↑
  • Muziek activiteiten

    Geen nieuwe activiteiten