Column Jan de Jong, column

Gepubliceerd op 29 april 2016 | door Webloug

1

‘Woarom nou’ column van Jan de Jong

Woarom nou

Doagen begunnen mit gewoontes.
Hond, katten, n stoetje, kovvie, laptop en kraant.
Holvaast ien n ruierge wereld.

Wel staait doar? Noast zien juf.
n Schoulfoto. Op fb. ‘Leerlingen van de School met den Bijbel’. Schoulraaiske noar Appelscha.

Mìen juf. Wat haar ik t te pakken op mien zeuvende. Dat laange kastaanjebroene hoar. Dat zaachte proaten.

Mor n grode minsenwereld is wraid.
Zai vertelde van Oadam ien t parredies. Ons laimeneer docht dat t wel ais handeg weden kon as der ook n vraauw was. Naachts het e oet Oadam zien lief n rib hoald en doar ain van moakt. Eva.
Zai haren t vrezelk goud mit heur baaident. En juf zol aanderdoags wieder vertellen.
Bekroop mie n maal gevuil dou k heur aankeek.

Wie heurden van alerhande bomen mit abbels, peren en proemen. Ain boom maggen zai nait bie kommen. Zit ook n slang ien en vanzulf binnen dij abbels veul lekkerder. Eva krigt heur ain. Lekker. Zai geft hom aan Oadam, kin dij hom ook eefkes pruiven. En din gaait t hail roar. Ienainen lopen zai ien blode gat. Ons laimeneer aldervrezelkst kwoad. En juf wol der n aander moal wieder over proaten.

t Was de zundeval. Eva heur schuld en Oadam het nait goud luusterd.
Ons laimeneer was nog aal kwoad. Ie zellen luustern.
Om te kieken of ie wel goud luustern mog soatan van hom Job negern en nittjen. Dij zat op drekstoup. Ain en aal ellèn. Onder de zwèllen en hai dee niks aans as kraben.

Ik haar t wel had mit ons laimeneer. Lusde gain abbels meer en kon naachts min sloapen.

Juf stoekte ien t verhoal van Job. Zai haar glad slovve ogen.
‘Ik leuf doar niks van,’ zee k. t Bleef eefkes hail stil ien klas.
Hai stravde mie votdoadelk.
Mien laive juf stuurde mie klas oet. k Mos op gaang.
t Was nog nait doan. Hoofd van schoul kreeg mie bie t oor. k Mos hom vertellen woarom of k op gaang ston.
Smirregs kreeg k n braif mit. Pa mos op schoul kommen, begreep ik dou k zunder eten op bèr mos.

Hou vandoag zo’n rötterge abbel joe vernijs nog dag bedaarven kin…

Tags: , ,



One Response to ‘Woarom nou’ column van Jan de Jong

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vier + zestien =

Terug naar boven ↑
  • Literatuur activiteiten

    Geen nieuwe activiteiten