Column Jan de Jong, column

Gepubliceerd op 9 februari 2015 | door Webloug

6

‘Woarom…!’ column van Jan de Jong

Woarom…!

Veurege moal zat doar n vraauw, met nog n poar toefkes hoar. Man wist noar t stee. Zai dee niks aans as frummeln aan t infuus. Moeke, nait doun, zee dochter nog. Aans doun wie joen handen vaast hur. Verpleegkundege mos boudel aalgedureg noakieken. Dou zai vroug: u bent mevrouw…? Bleef t stil. Joa, zee dochter. En wanneer bent u geboren? Vraauw zee dat zai dood ging. Dochter keek verschrikt rond. Hou kommen ie doar bie moeke, vroug zai.

Wie kriegen kovvie en kouk. Mit roombotter.

Vief mannen en ain vraauw aan n slankje.
n Koamer ien t zaikenhoes. Vol grode stoulen. Relaxstoulen. En chemo infuzen.

En ik bin haildaal allinneg, zegt n ol man. Hou t apmoal mout dommee? Hai krigt nog n kopke kovvie mit kouk. Lekker zegt e.

Drupkes valen. n Eernsachtege stilleghaid.
Wiedvot stoaren en tablets mit oordoppen.

n Jonge vraauw mie tegenover schraiwt zachies. Troanen binnen op. Ogen stoan hol.
Is wat vremds aan heur.

Wie kriegen apmoal n fruithapje. En nog wat te drinken. Der wordt goud om ons docht.

Hoe gaat het, vragt verpleegkundege. U bent meneer…? Joa. k Zeg geboorte doatum. Zai nemt blouddruk op. Te hoog.
Din zai k t ienainen. Ain kaant van heur prachtege zaachte trui zit niks onder. Haildaal niks.

Vouten en handen prikken en branden. Haals knipt mie dicht. Ik sloek. Ogen goan as vanzulf nog n moal noar vraauw mie tegenover. Heur dochter kikt om houk en doekt heur schraiwend aan.
Achter mien ogen begunt t te branden. Ik krieg buusdouk.

U bent meneer…? Geboren op? n Nij infuus. Zai kikt op t kastje en noar drupkes. Tied, zegt zai en nikt.
Joa, drupkes veur tied.

Komt n bliedege man binnen. ‘Goedemorgen!’ Hai kikt rond, vrift hom voest ien haand en is domie.
Ik druk oordoppen ien en klap laptop open.

Stoaren noar n leeg Word document.

Tikt mie ain aan scholder. Ik trek n oordop oet. U bent meneer…?
Ik? Ik wait t nait. Ik? Wenneer of k geboren bin? Ik?
Zai pakt n krukje.

Heurt dit lief bie mie?
Handen trillen. Ik typ.
Woarom…!

Tags: ,



6 Responses to ‘Woarom…!’ column van Jan de Jong

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

twintig + 8 =

Terug naar boven ↑
  • Literatuur activiteiten

    Geen nieuwe activiteiten