Algemeen Hogelandster Dictee

Gepubliceerd op 29 maart 2017 | door Jan Glas

0

Winnoars Hogelandster Dictee 2017

Op 28 meert wer Hogelandster Dictee holden ien Onderndaam. Der waren zo’n 80 man aanwezeg en 40 hemmen t dictee moakt. Tekst van Dictee ‘Tien geboden’ is opsteld deur Coby Vermeeren en Wil Werkman. Tekst wer veurlezen deur Waark-actrice Foske Hopma Zijlema. Henk Scholte prezenteerde de oavend. Tiedens t noakieken van de teksten was der n optreden van Harry Niehof.

De winnoars van t Dictee binnen.

1e prijs Petra Durenkamp 23 fout
2e prijs Frans Laning 30 fout
3e prijs Aukje Busser 31 fout

Bie de prominenten won Fré Schreiber mit 13 fout

Hieronder tekst van t Hogelandster Dictee 2017.

Dien levent is dienent!

Aan distied tou haar we n veuroetgang van volksgezondhaid en haar we verzekern van n schiere verzörgen. Dij t grode veurrecht het om aal mor oller/older te worden mout hom woaren veur ale oorzoaken dij zien leven ontiedeg bekörten kinnen. Hier volgen tien geboden dijstoe, mit n knipoog, onnaaiern kins.

Eerste gebod: Leef tiedloos.Elke dag dij die geven wordt is n oaventuur as tied hom nait versplintert en gaauweghaid hom nait verinnewaaiert.

Twijde gebod: Heb wat ommaans, goa bevubbeld braaien, kwastjen of toendjen en goa nait omschontjen. Stoens stilzitten is stoareg aan doodgoan, verainzoamen begunt mit onneudege prakkezoatsies.

Daarde gebod: Wor nait franterg over dien meleuren zo as zeubranden of veujoarsmuidhaid. Jeuzeln en jammern, sjantern en stìnnen is n langzoame vörm van staarven. Leef der overhìn.

Vaaierde gebod: Kiek nait ien t vleden. Doe moakstie/moaks die bespottelk en onmeugelk astoe denks dat jongern t nait beder doun zellen as doe. Wie gruien mitnkander/mit nkander noar toukomst tou.

Viefde gebod: Vaal jonkhaid nait haard as ze die opzied schoft en die schuld geft van n sjène dingen. Zai worden stoareg ook oller/older en t leven moakt heur wel wiezer.

Zesde gebod: Goa nait allinneg om mit evenòlders. Blief nait ien n kaauw zitten mor pebaaier midden maank mìnsen te blieven.

Zeuvende gebod: Blief smui, blief veldjen, diezulf oppeerdjen en swaarven, ook boeten dien aigen lutje krinkje . Elke strunentocht is n ontdekkenstocht.

Achtste gebod: Zuik zun op, ook t aledoagse leven kin vol zunschien weden. Din hols dokter van t lief. Laggen, schoedeln en gruilen holden die vris.

Negende gebod: Smörns nait op klender kieken, doe bis zo old astoe die vuils. Gain mìns mout dien woare leeftied roamen kinnen.

Tiende gebod: Leef zo dat mìnsen denken: “Kiek ais, hai is der ook nog, dij het gain last van slietoazie!” Dat is t schierste kompelmìnt dij ze die touswaaien kinnen.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

4 × twee =

Terug naar boven ↑