Column Fieke Gosselaar, column

Gepubliceerd op 31 mei 2018 | door Jan Glas

0

‘Wiezen’ column van Fieke Gosselaar

Wiezen

Ze zee gewoon wenkbraauw. Ze keek mie aan en wees mit heur leutje wiesvinger net boven mien oog. Ze wiest haile doagen noar alles wat ze zugt. Laif vertelde dat ze wees noar n vrachtwoagen en hail haard zee: ‘Wauw’, zoas ze dat zegt as ze echt wat biezunders zugt. Vrachtwoagenchauffeur zag t en keek tröts achter zien stuur. Even loater op de dag wees ze tussen gebaauwen deur wiedte in noar Martinitoren. ‘Wauw,’ zee ze weer. n Olle man heurde t en zag heur vol bewondern kieken noar Ol’Grieze. Man leek ontroerd en draaide zoch om noar Martinitoren en keek mit heur mit noar toren dij der altied staait.
Soavends haar ik heur op aarm en wie keken t roam oet. Ze wees noar t hoes van overburen en zee ‘Kiki’, t babytje van n poar weken old. Der ree n auto laangs. ‘Auto.’ Der luip n poes op stoupe. ‘Poes.’ Ze begon te reren en wiezen noar iets wat ik nait zag. Ze keek mie aan en wees noar heur oog. Ik zee: ‘oog’, mor dat wos ze al. Ik zee: ‘Neus’. Ze kwam mit heur gezicht dichterbie en drokte heur neuze op dij van mie. Dat dee ze n dag eerder ook bie Koos, onze grode katte. Dij vond t mor roar.
t Ging hom te ver dou ze in zien oog prikken wol. Katte haar net as zai twij ogen, n neuze en twij oren. ‘Aai,’ zee ze en legde heur heufd op zien lief. Twij seconden en den ston katte op, n beetje verontwoardegd keek hai heur aan. ‘Auto,’ zee ze en pakte heur loopauto om der even loater roakelings mit langs katte te rieden. ‘Nijn!’ ruip ze en begon te reren. Woar was heur kniene Jan? Ze wees onder toavel en pakte hom stief beet. ‘Woar is zien wenkbraauw?’ vruig ik en ze wees noar zien wenkbraauw. ‘En zien oren?’ Ze pakte zien laange kniene-oren en stopte t in heur mond. Jan zien oren binnen altied nat.

Tags: , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

twee + elf =

Terug naar boven ↑