Column Tonko Ufkes, column, goed lek

Gepubliceerd op 13 september 2016 | door Webloug

0

‘Weineg woorden’ column van Tonko Ufkes

Weineg woorden

n Zet leden, ien 1981, kwam de allereerste LP uut van Pé Daalemmer & Rooie Rinus en op die ploat stijt het verske “De Plattelandsvrouwen”. t Verske is schreven deur Peter de Haan en begunt met e regels: ‘De . . . meiden, de meiden, mogen ons graag verleiden / En hierzo in het Noorden gaat dat met weinig woorden’. Wel wiet waas dit n grapke op t veuroordeel van de zwiegzoame, stugge Grunnegers die om t aander woord niks zeggen. t Slag mensen dus woar zo’n honderd joar terug ien t “Grönnens laid” over zeid wordt: ‘Daor vuilt het haart, wat tonge sprekt / In richt- en slichte taol.’
Ien dat “Grönnens laid” worden Grunnegers beschreven met woorden as ‘dege degelkhaaid’ en met n wil ‘vast as staol’. Het liekt of tekstdichter G. Teis Pzn. juust groots is op dit soort veuroordelen. En misschien het hij bij t beschrieven van ons nog geliek ok, teminnent, ien t 2e couplet van t “Grönnens laid” stijt n biezundere regel woar ien 2016 zulfs verkeersbordjes veur moakt bennen. Die stok-olde regel van Teis gijt zo: “Maor rusteg waarkt en wuilt het volk”.

Dat wulen – vrij noar Geert Teis – kin vanzulf overal, mor op n parkeerplak bennen de verkeersregels duudlek genogt: het moet zo gaauw meuglek. n Veurbeelden van zo’n verkeersbord over t vrijen ien n auto stijt onder dizze column en de foto is moakt achter t station van Veendam. Ien t westen van e pervincie, bv. op t parkeerplak van Nienoord op e Leek, geldt: ‘Tút en derút’, ien t oosten is t: ‘Smok & vot’.

[woarom t vrijen ien Veendam hooguut n ketier duren mag is spieteg genogt niet ien weineg woorden uut te leggen]

OLYMPUS DIGITAL CAMERA

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

1 + 10 =

Terug naar boven ↑
  • Literatuur activiteiten

    Geen nieuwe activiteiten