Algemeen

Gepubliceerd op 6 maart 2013 | door Webloug

1

Week van de Grunneger Toal op RTV Noord

RTV Noord staait van zundag 10 meert t/m zodderdag 16 meert ien t taiken van de Grunneger toal.

Week begunt op zundag 10 meert mit Noordmannen op Verhoal: n verhoalenmörn vanoet het Koetshuys van Ennamabörg ien Midwolda. Onder meer Herman Sandman, Henk Puister, Erik Hulsegge, Henk Scholte, Bert Hadders en Fieke Gosselaar lezen heur staarke vehoalen veur.

Bie t doagelks radiopergrammoa De Centrale schoft Fré Schreiber aan en zien korte toallesjes t Kin ook aans binnen elk uur op radio te heuren. De muziek op Radio Noord het kommende week n ekstroa Grunnegstoaleg accent. Elke werkdag kommen smörns ien De Centrale en smirregs ien De Muziekfabriek Grunnegstoalege artiesten laans veur live-optredens. Onder meer Erwin de Vries, Edwin Jongedijk, Martin Korthuis en de groep Krödde kommen speulen.

Rond klok van 12:30 uur binnen – behaalve op vrijdag – schiere reportages te beluustern, moakt deur Wiebe Klijnsma. Twij Deuntjes veur Ain Cent staait tiedens de Week van de Grunneger Toal vanzulf ook haildaal ien taiken van de Grunneger toal.

Op TV Noord is elke waarkdag n Grunneger journaal ien Noord Vandaag. Mit elke dag n biezundere reportage, n toaltip van Fré Schreiber en oetleg van toalperfessor Siemon Reker over het Groninger woord van de dag.

Dat leste onderdail het te moaken  mit verkaizen van t schierste Grunneger woord. Via Altijd wat Anders én via www.rtvnoord.nl kinnen kiekers en luusteroars heur mooiste Grunneger woord nomineren. Der blieven vief woorden over woar op stemd worden kin. Dizze nominoatsie slut op 9 meert. Tiedens de Week van de Grunneger Toal staait elke dag ain van dizze woorden centroal en kin der stemd worden via www.rtvnoord.nl.

De Grunneger Dag op zodderdag 16 meert is ofronden van de Week van de Grunneger Toal. De radio en tv is dij dag haildaal ien t Grunnegs. Dus zowel de nijsblokjes, t nijs en ale pergrammoas.

Noord op Stee gaait dizze zodderdag n uur laanger deur. t Pergrammoa komt live vanof De Dag van de Grunneger Toal. Op dizze dag is ook de bekendmoaken van t schierste Grunneger woord. Zowel Toeters en Bellen (13:00-14:00 uur) as Café Martini (14:00-18:00 uur binnen ien t Grunnegs.

As ofsluter van de Dag en de Week van de Grunneger Toal zendt TV Noord t Grunneger Diktee oet. Marcel Nieuweweg prizzenteert t soamen mit schoulmeester Fré Schreiber. Bekende en onbekende Grunnegers zitten hierveur ien n specioal klaslekoal. Onder meer Henk Wijngaard, Bert ‘Burdy’ Schaap, Alex Vissering, Marjo van Dijken en Rob van Dam doun mit.

Luuster naor De Week van de Grunneger Toal op RTV Noord van zundag 10 t/m zodderdag 16 meert.  www.rtvnoord.nl

Tags: , ,



One Response to Week van de Grunneger Toal op RTV Noord

Terug naar boven ↑
  • Activiteiten