Column Jan de Jong, column

Gepubliceerd op 25 februari 2016 | door Webloug

0

‘Wat din wèl’ column van Jan de Jong

Wat din wèl

Slingert n wicht op fiets. Doppen ien oren aan n droad en kikt op iPhone. Achter heur komt n VW
Golf aansnittern.
En din gaait t apmoal rad.

Bats! t Geluud van schroapend metoal. n Fiets springt n moal of wat over kop en auto vlugt schuuns
over stroat tegen n lanteern dij aan aanderkaant ien weeg staait. Aan ziedkaant bungelt n boetenspaigel
mit verwarmen hinneweer aan n poar droadjes.

Stilte en gain bewegen dut mie huvern.

Din kropt t wicht op handen en vouten oet stroekerij over stroat.
n Jong, mit n petje en blaik om snoet komt oet auto. Geliek lopt e noar t wicht dij nog aal over stroat
kropt. Hai krigt heur verzichteg bie aarm.
As stoken springt zai ien t ìnne en bèlkt. ‘Klootzak! Kinst nait beder oetkieken?’
Jong dut n stapke achteroet. ‘Sorry. Sorry hur.’
Zai trekt doppen oet oren. ‘Wat? En most ais kieken wat ofstoe ommaans had hes.’ Ien heur haand ligt
wat over bleven is van wat ains n handeg communicoatsiedinkje was.
Hai slagt ogen deel en bogt kop. ‘Sorry.’

Oavends, op heur koamer zitten baaid stief noast nkander op heur twijzitsbedbankje.
Hai kikt tillevisie. Voetbalen. Ain haand op heur knij en ien aander n blikje drinken.
Zai, mit kleur om snoet en oordoppen ien drukt drok hinneweer mit doem op n nije, kregen iPhone.

t Is nait wat of ie meschain denken. Gain recloame veur: n zörgverzekeroar, n iPhone, n verzekern
veur n iPhone, nije oordoppen, n Gazelle fiets, of n fietsverzekern, n staarke spiekerboksem, n tang
doar joen hoar goud van zitten blift, vaaierntwinneguursdreug moandverband zunder lekken, smeer
veur jeugdpuistjes, bloumde twijzitsbedbankjes, lenzen van Hans Anders, vekaanzies veur twij man ien n waarm laand, of VW Golfjes mit verwaarmde boetenspaigels, n autoverzekern, n oetdeuk- en
spuitersbedrief, petjes, lekker roek, blikjes cola of aander drinkerij, Vogel zien draaibeugels aan muur
veur n tillevisie, nije tillevisies, EO, soa’s, kapotjes… Ik dou tillevisie oet.

Aal dommeghaid.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

zes − 4 =

Terug naar boven ↑
  • Literatuur activiteiten

    Geen nieuwe activiteiten