Column column jan glas

Gepubliceerd op 22 februari 2015 | door Jan Glas

2

‘Wanhoop en troost’ column van Jan Glas

 

Wanhoop en troost

Lest mos ik veurlezen ien Perdu ien Amserdam tiedens de ‘Avond van de wanhoop’. Veur zo’n themoa draai k mien haand nait om, n aantal van mien gedichten schuren tegen wanhoop aan of hemmen der n klap van mitkregen.

Der was n zanger dij wanhopege laidjes zong en nog n poar sprekers. Ain van de sprekers, Barend Beekhuizen, gaf n lezen over ‘troost’. Troost kin wanhoop verzaachten. Je kinnen troost ontvangen en geven, zee e, mor je kinnen t ook kwietroaken. As veurbeeld lait e ons n regel lezen: ‘Zij zocht haar troost in eten’. Dat ‘haar’ veronderstelt dat ze iets wat eerst van heur was, kwiet worden was. Je kinnen troost nooit kwietroaken deur t aan ain te geven, zee e ook nog. Ik von dat slim loze opmaarkens.

k Haar ofgelopen anderhaalve week griep, en mos der bie liggen. As ik zaik bin wil ik laiver nait ien ber liggen, doar vuil ik mie ofsloten van wereld. Ik goa op baank mit n deken over. Hou verloaten en aarm ik mie zaik ien ber vuilen kin zo troostriek is t liggen op baank. Alles binnen berek. Kop thee, films en series op laptop, Wordfeud speulen en bouk lezen op iPad, òf en tou even noar koelkaast. Asof ik miezulf wat extroa aandacht geef, troost.

Dat haar ik as kiend al, as ik zaik was mos ik vanzulf ien ber blieven. Din heurde ik mien moe beneden rondscharreln, bèl van ons winkeltje en vuilde mie hail allain ien ber. Mor aargens ien dag mog ik, as ik der n zetje om bedeld haar, op baank ien koamer. Din kreeg ik de aandacht dij k, as ain van zeuven kiender nait altied kreeg. De troost van n moe dij extroa laif dee tegen heur zaike jonkje. t Was heerlek om nait noar schoul te huvven. De speulplaaingeluden van roomse schoul woar wie noast woonden verstaarkten t gevuil verlöst te wezen van n plek woar ik mie, tussen ale kiender, voak ongelukkeg vuilde en miezulf boetensloot.

Hou old ik bin, ik kin nog aal as k laans n vol schoulplaain kom de wanhoop van t speulketaaier vuilen.

Tags: , ,



2 Responses to ‘Wanhoop en troost’ column van Jan Glas

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

acht + vijftien =

Terug naar boven ↑
  • Literatuur activiteiten

    Geen nieuwe activiteiten