Column Fieke Gosselaar, column

Gepubliceerd op 6 maart 2015 | door Webloug

0

‘Wachtwoord is inlognoam’ column van Fieke Gosselaar

Wachtwoord is inlognoam

Veur verschillende computerprogramma’s op t waark heb ik verschillende wachtwoorden en sums bin ik inains mien wachtwoord vergeten. Den kin ik de helpdesk Spirit bellen, moar dij lien is voak bezet, zodat ik der laiver veur kais om n mailtje te sturen.
‘Goidag, ik bin mien wachtwoord kwiet. Mien gebruukersnoam is Gosselaar.’
Even loater krieg ik n mailtje weerom.
‘Moi, ik heb dien wachtwoord aanpast. Dien wachtwoord is: inlognoam.’
Mooi, denk ik, en direct prebaaier ik mien nije wachtwoord, moar ik kom nog steeds nait in t computerprogramma. Ik toets mien wachtwoord nog n moal in en krieg n foutmelding.
Weer schrief ik n mailtje noar de helpdesk Spirit.
‘Moi, bin ik nog n moal. Ik heb net mien nije wachtwoord ‘inlognoam’ prebaaierd, moar hai waarkt nait. Ik kom der nog steeds nait in.’
Noa vieftien minuten gaait mien telefoon. ‘Wat begriepst nait aan, wachtwoord is inlognoam?’
Boven mien heufd verschient n vroagtaiken. ‘Ik heb gewoon ‘inlognoam’ intypt, mor dat waarkt echt nait.’
Even is t stil aan aandere kaante. ‘Wat is dien inlognoam?’
‘Gosselaar.’
Doarnoa klinkt n daipe zucht. ‘Wat is den dien wachtwoord?’
‘Oooooooooooooooh,’ zeg ik en ik vuil mie nait slimte mins op de wereld.
Toch duurt dat gevuil moar kört, want soavends komt mien buurman langs en ik vertel hom mien verhoal. Hai waarkt op n call center en het ook te moaken mit verschillende computersystemen.
‘Ik haar t n moal andersom’, zegt hai. ‘Ik stuurde n e-mail veur n nij wachtwoord en dou kreeg ik in t antwoord weerom dat mien wachtwoord ‘user id’ was. Ik docht, user id, dat is mien gebrukersnoam, dus typte ik mien achternoam in. Dat waarkte nait. Ik werd oetlaagt, omdat ze toch dudelk zeden dat t wachtwoord echt ‘user id’ mos wezen.’
‘Binnen wie nou zo loos?’ vroag ik aan laif.
Hai schrikt op oet n gedachte. ‘Ik heb gain verstand van computers,’ zegt hai.

Fieke Gosselaar leest HIER de column voor op Radio Noord.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

8 + 3 =

Terug naar boven ↑
  • Literatuur activiteiten

    Geen nieuwe activiteiten