Column Tonko Ufkes, column, goed lek

Gepubliceerd op 11 mei 2015 | door Jan Glas

0

‘Vroag & Antwoord’ column van Tonko Ufkes

Vroag & Antwoord

V: ‘Meneer, mag ik wat vroagen?‘
A: ‘Ja vanzulf, mor k ben hier amper bekend, ik woon ien n aander wiek.’
V: ‘Oh, doar gijt het niet om, t komt omdat joe zo op ons vroegere tuunman lieken. Het hoar, de kleren, joe hemmen net zo’n uuterlek.’
A: ‘Ik ben gien tuunman, ik ben – nou ja – ik ben schriever.’
V: ‘Kiek aan, mooi, schriever nog wel. Dat treft, schrievers bennen voak wat lösser.’
A: ‘Lösser? Hoe bedoelen joe lösser?’
V: ‘Schriever dus, best. Nou, dan duur k het wel vroagen.’
A: ‘Ja, joe kinnen me gerust wat vroagen, zeker over verhoalen of gedichten.’
V: ‘Eileks vroag ik t joe as schriever en as tuunman.’
A: ‘Goed, misschien wiet ik het wel.’
V: ‘Aan joe kin k het wel vertellen. n Haalf joar terug heb k ons tuunman votstuurd en nou spiet me dat geweldeg.’
A: ‘Ik ben gien tuunman, dat zee ik toch al.’
V: ‘Joe bennen schriever, ik wiet het wel en dat komt goed uut want doarom begriepen joe vast mien vroag.’
A: ‘. . .’
V: ‘Ik leg joe t hiele geval uut en t is me nou al duudlek: joe bennen de juuste man. n Haalf joar terug heb ik ons tuunman votstuurd omdat er n verholdeng har met mien vraauw en nou zuuk ik – zuken wij – n nije.’
A: ‘Mor ik ben schriever.’
V: ‘Joe begriepen de kwestie nog altied niet, ik zel t uutleggen zo as t is. Toen mien vraauw t stiekem hiel met die tuunman waas ze slank, fleureg en oardeg tegen mij en e kiender. Nou is dat hielendal over, echt kompleet over. Vandoar dat ik – dat wij – op zuuk bennen noar n aander.’
A: ‘Joe zuken dus n man veur joen vraauw?‘
V: ‘Nou bennen we der! Kiek, op dit visitekoartje stijt mien E-mail adres en Nul-Zes nummer en as t – zeg mor – goed voldut worden joen onkosten vergoed.’
A: ‘Eh, mag ik misschien ok wat vroagen? Wiet joen vraauw van dizze zukerij?’
V: ‘Nee zeg, mor tegen die tied bedenk ik wel wat. Joe zollen ons geweldeg helpen. Wacht, ik geef alvast n klein veurschot, n soort begun.
A: ‘Dat veurschot komt ien elks geval van pas, bedankt.’
V: ‘Tot kiek, denk ik hè. Tot kiek.’
A: ’n Prettege dag verder.’

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

twaalf + acht =

Terug naar boven ↑
  • Literatuur activiteiten

    Geen nieuwe activiteiten