Column henk puister, column

Gepubliceerd op 4 april 2016 | door Webloug

0

‘Vrienden’ column van Henk Puister

‘Vrienden’

Heino is ainegst kind. Kammeroadjes het e nait. Meschien komen dij loater. As e older is. Hai zol groag aine hebben willen om mit te voetbalen. Mor allain wil t ook. Dribbeln, pingeln, hoogholden, peunen op doel. Bakstaine is doel. ‘Nait in toene komen. Bliksiekoater. Vertrap dij bloumen nait!’ Hai mag ook niks. As e bale tegen mure aan schopt den dreunt dat zo, dat pap krigt der kopzere van. Hai is muide van t waark. Heino het wel vrundinnechies. Zien buurwichter. Binnen veul buurwichter. Pabbe en mamme speulen is gain barst aan. Den mout e noar lutje potje kieken in waigje. En laive woordjes zeggen. Veur d’rest mout e stokstief stil op stoule zitten blieven. Doktertje speulen. Hai is dokter. Zuster helpt. Elke moal n aander zuster. Pesjenten zitten in wachtkoamer. Gounent willen gain pesjent wezen. Zai goan vot. Baangschieterds.

‘Mag ik asjeblieft op Heino zien verjoardag komen, vraauw Punter. k Heb ook n kedootje bie mie veur hom. Kiek mor.’

Hai loert om hörntje. Zai kin hom nait zain, dat wicht. Bie achterdeure staait ze tegen zien mam te proaten.

‘Dat maal wicht der nait in loaten, vraauw Punter, hur. Zai mout aaltied heur zin hebben… n Roeziemoaker is t. n Eelske medde!’ Vrundinnechies roupen tou koamer uut.

‘Heino. Kom ais.’ Hai komt bie achterdeure. ‘Riwanna mag toch wel mit joe mitdoun?’

‘Ze mout votgoan,’ zegt e. ‘Wie maggen heur nait lieden.’ Mit draait e zok om en lopt noar koamer tou. Hai staait stil, luustert. Wat zegt mam tegen heur? Hai zugt t wicht votgoan. n Pakkie in haand. Schraift ze? Wat is ze klaain. Dat zugt e nou pas.

‘Wolst nait op Facebouk, mor volgens mie bist der aalvot mit bezeg,’ maint kammeroad. ‘Moakst iederaine dien vriend, is t nait?’

Twijde kammeroad zegt: ‘k Heb Heino holpen dat uutdoagend petret van Facebouk te hoalen.’

Eerste kammeroad: ‘ As doe aine nait kinst den gaaist morzo op heur vrundschopsverzuik in? Most uutkieken, kerel. Ast n verzuik krigst van n vraauw dij mor ain of mor twij of drij vrienden het, den is t gain zuvere kovvie… Ha…ha…ha… Of lust groag kovvie dij nait zuver is..?’

…Allainwonende Heino trekt mit scholders. Hai is diadigibeet. n Kompjoeterkloot mit suker. Joareg is e vandoage. Hai is wies mit zien vrunden. n Poar echte vrunden. Heur goie road stelt e pries op. Hai nemt n slok wien. Vrienden. Feestbouk? Hai mout nog zo veul leren.

Dulek zugt e heur votlopen. Hailmoal allain. n Sneue neuze. Klaain van verdrait. ‘Magst der gainent bie stoan loaten, Heino, hur.’ Ze is jonk overleden: Riwanna.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

7 + 11 =

Terug naar boven ↑
  • Literatuur activiteiten

    Geen nieuwe activiteiten