Column henk puister, column

Gepubliceerd op 5 september 2017 | door Jan Glas

0

‘Vraauwlu binnen pas kerels’ column van Henk Puister

Vraauwlu binnen pas kerels

‘Oranje ontsnapt tegen Denemarken’, leest hai in swaartdrukde letters op sportbladziede in kraande. t Gaait om EK Doamesvoetbalen. Vraauwluvoetbaalderij n zummeroavendsport? Magst t allain mor denken. Gedachten binnen vrij, ast ze mor nait te haardop denkst. ‘Wie’ hebben hom wonnen mit ain – nul en nou staait Oraanje mit ain bain in d’volgende ronde.

Zai zitten aan toavel bie d’hoogbejoarde man thuus aan d’smoakelke oavendmoaltied. Links van hom zit opa. Hom liek tegenover zit vrundin. Noast vrundin zit heur vrund Milan, dij vanoavend t eten kloarmuik. Leu’jong keudelt aal wat hèndeweer. Stoule op, stoule òf. Hai puult wat om in zien bordje mit eterij. Vingers vol temoatensaus. Vrundin krigt t over voetbalen veur vraauwen. ‘Wat vindst doe dervan, Mees?’ Uutkieken mit antwoord geven. ‘Och, wat zel k zeggen,’ begunt hai verzichteg. ‘Mannen dij voetbalen binnen watjes!’ komt ze fel uut d’houke. Oei, oei, dat temperment van heur. ‘Woarom is dij voetbaalderij veur mannen toch zo belaangriek? Net of der niks intersanters op d’wereld bestaait. En woarom wordt der zo waaineg aandacht schonken aan doamesvoetbalen. Binnen doames ain spier minder?’ Mees kikt noar opa noast hom. Ol man is doveg en zit lekker te smikseln. Aal zien verstaand het e bie zien etensbord. Hai is n voetbaallaifhebber op en top. ‘Lekker,’ zegt e zachies. Mees kikt noar Milan, hom schuuns tegenover. Bie zien waiten geft hai mor waaineg om voetbalen. Onderzuikend kikt Milan hom aan en zwigt. ‘Van mie maggen vraauwlu gerust tegen n bale trappen, as ze dat groag willen,’ holdt Mees zok op d’vlakte. Zai der vot overhèn: ‘Dat mout der ook nog biekomen: dat kerels ons verbaiden willen om voetbalen te goan! Dat zol wat wezen!’ ‘Hest der vraauwen bie dij oardeg wat mit n bale worden kinnen,’ komt Mees heur haalf tegemuide. ‘Doe vindst t niks, hè,’ antwoordt ze. Hai, toch. Hai wos nait dat ze zok zo dik moaken kon om d’edele voetbaalsport. ‘Eerlek zegd, k bin aigelk allain mor wènd om noar wedstrieden te kieken dij deur mannen speuld worden. Meschien mout k toch voaker…’ ‘Kerels binnen mizzelke en verwènde kinder as ze in t veld achter n bale aanrunnen. Ze goan bie t minste of geringste liggen en gilpen en gieren t uut. Wat n klaainzereghaid! Dat zugst bie vraauwlu nait. Dij dailen uut en aksepteren net zo makkelk. Zunder ain onvertogen woord. Kerels spijen mekoar in t gezichte en perbaaiern mekoar n koarde aan te naaien. Bah, hé! Waalgelk!’ ‘Shirtje wizzeln vinden manlu over t aalgemain t mooiste van doamesvoetbalen,’ bruukt hai d’achterhoalde dooddouner en doalek het e spiet van wat e zegd het: ‘Sorry, k bin flaauw. Mor eh…Vraauwlu binnen aans baauwd as kerels.’ Hai woagt t der op: ‘As joe, laive wichter, n bale tegen joen borsten aan kriegen liekt mie dat gloepende zeer te doun en mit schut hom t in t onderlief en vuilt e weer de vlinthaarde leren balen achter nkaander dij hom vol op de zak ofvuurd wuiren. Hai snakde noar oâm. ‘Ik zel in t vervolg meer oog hebben veur de doamesvoetbaalsport,’ belooft e heur.

Mees zag n hap en n snap van twij wedstrieden van d’Oraanjedoames op televizie. Zien ogen vlogen van d’makkelk leesboare novelle ‘De laatste dag’, schreven deur d’Italioan Beppe Fenoglio, n swoar onderschatte schriever, noar t beeldschaarm. Hai verwonderde zok aalgedureg over wat e zag. Zien vlugge konkluzie: t wicht het geliek. t Nivo was laank nait slecht. Vraauwlu wuiren ongenoadeg onderuut schovveld. Mor zunder gemekker kwamen ze overènde en luipen manhafteg vot. Hai zag gain vilaaine en geniepege streken as mekoar aan t hoar trekken en in de titten kniepen. Vraauwlu, dat binnen pas kerels!

Heur HIER hou Henk Puister dit verhoal veurleest.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

achttien − 15 =

Terug naar boven ↑
  • Literatuur activiteiten

    Geen nieuwe activiteiten