Column Harry Niehof, column

Gepubliceerd op 3 maart 2016 | door Webloug

0

‘Vraauw Smit’ column van Harry Niehof

Vraauw Smit

Vraauwlu kwammen der dus nait ien t café, ook nait ien t gereformeerde Café Niehof. Zölfs mien moeke kwam der nait as t open was, dij kwam der allain mor om boudel schoon te moaken. Verainen van plattelandsvraauwen was der noatuurlek wel, mor dij kwammen allain mor boven op zoal en nooit ien jachtwaaid.

Vraauw Smit was n oetzundern, dij kwam hoast elke week wel n moal ien jachtwaaid. Nait om bie stamtoavel aan te schoeven, mor om heur kerel op te hoalen. Ze waren net n joar traauwd, en as je traauwd waren, den mos je der mit joen baaid aan waarken dat t n succes wer. Doar paasde nait bie dat ain van twij ien t café t geld zat op te moaken.
Jan Smit was n beste kerel, n laiverd ook wel, mor as e ainmoal op proatstoul kwam, den wol t nog wel es loat worden. ‘Jan Smit, t is haalftien,’ raip vraauw Smit deur jachtwaaid. ‘Joa, ik ben doen, mor doarom ken k nog wel klokkieken,’ zee Jan. Hai zee dat om zien gezicht te redden veur aander klanten aan stamtoavel, mor dij keken ien heur glaske en zeden niks. ‘Mit doe,’ zee vraauw Smit, en doar ging t hèn mit heur baaident, zai rechtop, hai mit n beetje n gebogen rug.

Jan is al joaren dood, hai is op t waark van n staaiger valen en het zien pensioun net nait hoald. Vraauw Smit leeft nog en woont nog aaid ien t hoeske vlak bie kerk, dat ze mit heur man kocht het dou e draank òfsworen haar. Kiender bennen allaang te t hoes oet, al woont der gelukkeg nog wel n zeun van heur ien t dörp, en dij komt hoast elke dag wel even kieken.
Doar is ze blied om, want ze moakt heur zörgen, en doar mot ze òf en tou toch even over proaten. Hou zit dat nou mit dij eerdbevens? Schoa het ze nog nait, mor ze heurt gekroak op zolder en den bonkt t haart heur ien keel. Je waiten nait hou of t verder gaait. Wat mot ze doun? Sums, hail even, vuilt ze n lichte trilling, en dij zigt ze den ook in t loagje jenever ien heur kovviekopke. Haile eerdbevensproblematiek wordt hier terugbròcht tot n rimpeling ien t kovviekopke van vraauw Smit.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

5 × 1 =

Terug naar boven ↑
  • Literatuur activiteiten

    Geen nieuwe activiteiten