Column henk puister, column

Gepubliceerd op 9 mei 2016 | door Webloug

0

‘Vraauw foetsie’ column van Henk Puister

Vraauw foetsie

Aan telefoon verrastde hom n mannenstim. Hai staait bie ofhoalChinees. Moagere hiepenkriet is drok in de weer. Gain spoor van de vraauw. Chinees verwelkomt hom körtof. ‘Besteld?’

‘Joa, deur telefoon,’ antwoordt e.

‘Zo klaar.’

Zai was der aaltied. Al joaren lopt e bie heur. Moe bestelde veur telefoon en hai hoalde t of mit auto. Dou ollu op camping waren, bestelde hai zulf. ‘Moeder is op de camping,’ verteld’e op heur vroage. n Zummer loater bestelde hai vannijs. Ze vruig: ‘Moeder op kampong?’

Vrij onverwachts kwam zien moeke uut tied. Hai hoalde Chinees veur wat femilieleden en homzulf dou ze van kremoatsie kwamen. ‘Moeder is overleden,’ zee e tegen heur. Heur laankrekde: ‘….Ooohhh…’ drukde meeliedeghaid uut. Mit heur: ‘Moeder lieve vrouw,’ ruik ze zien gevuilege snoare.

Hai kikt om zok tou. Zel e vroagen? Is e gain ol wief? Hai woagt t der op. ‘Is uw vrouw ziek?’

‘Vrouw weggelopen,’ vertelt de Chinees. Gain spiertje emootsie. Perpleks staait e. Votlopen! Wat nou. Hebben ze hoogoplopende roezie had, zai en heur man? Aaltied was ze monter. Was t rusteg in de zoak den muik ze wel ais n proatje. Mainsttied over t weer. t Haar waaineg om hakken. Over d’leefomstaandegheden in China haar e t mit heur hebben wild. Over d’verholdens tussen man en vraauw. Chineze feestdoagen. Mor hai wait allain van heur dat ze n enkeld moal noar China op vekaansie gaait. Soms komt heur moeke uut China bie heur in dit klaain kikkerlaand. Ze glimlaagde gehaaimzinneg en hai ston der schoapachteg bie. ‘Eet smakelijk,’ gaf ze hom mit. ‘Uw eten is altijd lekker,’ zee e noar woarhaid. ‘Dank u wel.’

Nou is ze vot. Veurgoud vertrokken? Schriever Richard Klinkhoamer vermoordde zien aigen vraauw en zol heur deur d’gehaktmeulen draaid hebben en in toene begroaven. Wel is in stoat zokswat te doun?

Inains heurt e n deure. n Vroleke lach. De vraauw. Zai is der weer. Ze groet hom zangerg bliede as aaltied. Ze het n hond aan d’liene. Daaier is bekof.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

dertien − vier =

Terug naar boven ↑
  • Literatuur activiteiten

    Geen nieuwe activiteiten