Column Tonko Ufkes, column, goed lek

Gepubliceerd op 19 oktober 2015 | door Webloug

0

‘Votdreumen’ column van Tonko Ufkes

Votdreumen

Het is n dreum en argens wiet ik dat.
Over n smalle weg loop ik noar t oosten, teminnent, de hiete oavendzun schient op mien scholders en rug, dwaars deur t T-shirt vuul ik het gluien. Niks an dizze weg komt me bekend veur; de bochten en de bomen niet en zomor valt me op dat hier gien huzen stoan. Gien enkel huus of boerderij, ok ver vot – recht veuruut, noar links of noar rechts – zie ik niks. Gien kerktoren of meulen of wat dan ok. Hier kom ik veur t eerst en ok het laand liekt nij.
t Wordt gelukkeg minder waarm, t is aangenoam nou t òfkoeld en ik loop steveg deur want ik ben der nog niet, hooguut haalfweg veur mien gevuul. De zun stekt niet meer en mien schare die metliep is ientussen verdwenen. Eefkes blief ik stilstoan om achterom te kieken: de zun is ondergoan. n Hiel ènde vot zie k wat swaarts, n trekker of n auto ridt me achterop. n Best zet blief k stoan om t zeker te wieten. De auto komt mien kaant uut, mor ridt zo laangzoam dat ik nog niet ien e baarm huuf. Ik loop, ik moet per slöt verder.
Onverwachts is er toch vlak bij me; ik heurde niks ankommen, ok al waas k der hieltied op verdocht en ik stop ien e baarm om hum veurbij te loaten. Hij is stoan bleven; groot en swaart stijt er midden op e weg. Ik draai haalf, noar de auto, mor loop der niet hìn en gieneen komt der uut. Ieneent goan toegelieks de beide veurste deuren open, ik wacht, mor de bestuurder blift zitten en doarom goa ik die kaant uut. Bij t ienstappen zie k dat goenent achter de auto stoan, kloarstoan. En as we zaacht votrieden, volgen ze.
Het is n dreum, volgens mij is t toch echt n dreum.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

19 + twaalf =

Terug naar boven ↑
  • Literatuur activiteiten

    Geen nieuwe activiteiten