Column Jan Glas

Gepubliceerd op 7 juli 2017 | door Jan Glas

0

‘Vogelstilte’ column van Jan Glas

Vogelstilte

Mien zummer is n stuk koaler dit joar. k Woon dizze moand juli persies dareg joar ien mien hoes aan de Hardewikerstroat ien Stad. n Golden plek. Van dij dareg joar heb ik negenentwinneg joar vanof mien balkon oetkeken op n haile olle, grode kestaanje. n Roodbluier. Leste joaren wer e rap minder. Bovenkaant bleef koal en rejoal bluien lukte hom nait meer. Kestaanjezaikte. Ind veureg joar is boom kapt. Kap was aankondegd ien Gezinsbode. k Heb gerdienen dichtholden toun ze op n zodderdag boom aan t sleupen waren. Ik kon t nait zain. k Bin nait al te goud ien ofschaaid nemen. Dou k gerdienen opendee zat der ien mien wereld n hail groot gat. t Natuurlek evenwicht was vot.

n Klaain ekkelboomke is even loader veur de gesneuvelde reus ien stee kommen. n Onneuzel iepenkriekje. n Couveusegevalletje bleek; t leek derop dat e zummer nait hoalen zol, knoppen bleven tot ver ien t veujoar stief dicht. Ien maaimoand is e nog aan n wodderinfuus legd; n meterslaange slang vanoet ain van de hoezen, aansloten op n keukenkroan. t Schietdinkje het t mor naauw red. Mit haile lutje bladjes staait e nou veur boom te speulen.

Mit t kappen van kestaanje is de grode vogelstilte ienvalen. Aal dij joaren nuzzelden der holtdoeven ien boom. Ik mis de mooie gebogen vluchten dij ze vanoet kestaanje noar vledder mouken dij zo’n viefentwinteg meter verderop staait, ook al n oldje. Ien t veujoar pikten doeven ien blommen om, ien t noajoar aten ze van bezzen, op en deel zuzaaiend op takken. Ien top van kestaanje zat soavends voak n liester te zingen, dij concerten binnen oflopen. Aan stam van kestaanje hong n mezennustkasje. Kastje vot, mezen vot.

k Heb aal dij joaren volgens mie nait bot veul jonge doeven zain. Vloamse gaaien mor ook oksters vlogen aal om en ien boom op jacht noar doeveaaier en -jongen. Dat gaf altied veul onrust en lewaai, der wer vochten. Nou is t stil. Ien vledder zitten hail sums nog wel holtdoeven, mor t binnen mien holtdoeven nait. As ekkelboomke domment groot is bin ik dood. Ik las dizze week dat der minder gierzwaalfkes binnen dit joar. Ien t haile verhoal verboast mie dat niks. Vogelstilte.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

zes + 10 =

Terug naar boven ↑
  • Literatuur activiteiten

    Geen nieuwe activiteiten