Column Chris Kiel, column

Gepubliceerd op 22 februari 2019 | door Jan Glas

0

‘Veuroetgang’ column van Chris Kiel

Mien longen binnen nait meer zukse besten. Ik heb ook ja joaren laank nogal wat rookt. Dom, mor k har nooit last. Totdat bie n keuren aine mien longinhold te klaain von en vruig wat mien hoesarts doar van zee.
k Bin van schrik opholden mit roken en n poar weke loater heb k dokter beld. Dij stuurde mie deur noar n longarts.
COPD zee dij. Ik kreeg pufjes en pillen en noa n zetje ook problemen mit longen. Doarom advizeerde longarts mie n joar of tiene loater n sportschool of fysiotherapie om meer lucht te kriegen.
Sport is niks meer veur mie. Ik heb knikkerd tot mien twaalfde, voetbald tot mien vattegste en nog n poar joar tennist mor dou von k dat t oflopen wezen mos. As k n moal mui worden wil, goa k wel toene groaven. n Endje skeelern of zo ken ook. Mor gain spelletjes meer. Doarom wör t fysiotherapie.
Eerst n intakegesprek. Ik zol zeggen: even kieken wat we doun, mor dat kost gain € 35.
INTAKE dus.

Zo beland ik bie de fysiotherapeut in de trainingszoal. Of mien longinhold doar groter wordt, wait ik nait, mor mien inzicht in de mechanisoatiegeschiedenis wel!.
Noa de Batavieren binnen we begonnen machines oet te vinden veur zwoar waark. Ooit mos je joe oetmekoarfokseln om in n holle boomstam t Zuudloardemeer over te kommen, nou binnen der zaail- en motorboten. Wel van Waarvum noar Bavveld mos, kreeg bloaren van t lopen. Fietsen is n stuk makkelker en mit n auto gaait t vanzulf.
Mor in n trainingszoal is t andersom. Doar is n loopbaand, n machine woar je bloaren van kriegen zunder dat je n stap dichter bie Bavveld kommen. n ‘Boomstambaand’ is der nait, mor aal n apperoat woar je joe te pletter op roeien en je kommen t Raskerdermoar nog nait over. Wel loaten je n plomp woater in n plexiglastrommel klotsen, dat as je d’ogen dicht doun, kennen je joe verbeelden dat je op t meer zitten. Zo zörgt de veuroetgang dat je joe toch nog n beetje n Batavier vuilen.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

3 × twee =

Terug naar boven ↑
  • Literatuur activiteiten

    Geen nieuwe activiteiten