Column Tonko Ufkes, column, goed lek

Gepubliceerd op 5 februari 2016 | door Webloug

0

‘Veurbijgoan’ column van Tonko Ufkes

Veurbijgoan

Ien t lest schoef ik de grote tuundeur open, blief nog n zetje stoan en stap dan noar boeten om op t terras te zitten. Of nee, de hiele dag heb k al zeten – ien e wachtkoamer, ien e spreekkoamer en onderweegs noar huus ien e auto. En net zat ik weer, met n glas thee veur me en e tillefoon ien e haand; woar ik stoan wil, lopen eileks.
t Is hier host lieke waarm as binnen mor t oademen wil beter, t wordt argens roemer ien mien kop nou k over t gras, de vaste planten en e bomen de duustere lucht zien kin. Verre weerlichten schieten sums hinneweer, zunder dat dunder klinkt. Dat komt vast loater.
Midden noar t grasveld goa ik en schop e schoenen uut om t stiekelgras te vulen, vulen dat t prikt onder mien voeten en k spreid e aarms wied en rek tot e jasmijn links en e margrieten rechts. Zo stoa ik, blief ik ien e waarme, duustere oavend en kiek noar gunders, de springende weerlichten, hoog achter de bomen.
Dikke druppen tikken zomor op mien blote aarms en op mien gezicht en as vanzulf goa k onder de dikke kastanje stoan om te schulen. Ik zie hoe de regen op t dreuge gras valt, denk an e planten, hoe die nat worden en stap onder de kastanje vot. Midden noar t grasveld.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

19 − 11 =

Terug naar boven ↑
  • Literatuur activiteiten

    Geen nieuwe activiteiten