Muziek

Gepubliceerd op 18 maart 2015 | door Jan Glas

0

Veul muziek op Dag van de Grunneger toal

Om 11:30 begunt t optreden van Marieke Klooster & Philip Baumgarten Trio. Ze hemmen n nij pergram moakt: De Nieuwe Jas van Ede. Laidjes van Ede Staal, ‘moar din aans’. Ze hemmen Ede’s muziek ien n nij, fris jaske stoken woarbie zai heur hebben loaten inspireren deur verschillende populaire meziekstielen. t Resultoat is verrassend: n sums jazzy en  swingend, din weer iengetogen concert woarbie t authentieke karakter van de laidjes ien t ìnd blift. Lees meer…

Om 12:10 treedt Swinder op. Bas Schröder, zanger van Swinder is geboren en togen onder de rook van Grunnen, Stad mor wil joarenlaang niks waiten van t dialect dat ien t dörp sproken wordt. t Duurt n lutje decennium tot noa t heuren van de Grunneger chansonnier Ede Staal t kwartje vaalt: t Grunnegs kin hail schier wezen, as je der moar schiere dingen ien zeggen, of zingen. Ientussen is Swinder n laange reeks live-optredens verder en is der de eerste CD én elpee: ‘Swinder’. Lees meer…

De band Krödde staait om 12:50 op t podum ien de centroale hal. Krödde wer opricht deur de vrunden Rients Faber (zang) en Bart Corporaal (pioano en zang). t Duo komt oet t lutje Ten Post en brengt al vrij rap as demo t nummer Duuster oet via YouTube. t Nummer wordt oppikt deur lokoale en regionoale radiostations. Doarmit is Krödde officieel lanceerd en ontstaait d’ambitie n CD te moaken ien aigen beheer. Der wordt n band formeerd en noa n haalf joar sleuteln en ìnd 2013 is der de CD Waterlijn. Lees meer…

Erik Harteveld en de Kopstubbers treden aan om13:30. Harteveld speult al meer as vatteg joar Nedersaksische blues. Hai gruide op ien Drenthe en neumt homzulf twijde-generoatsie bluesmuzikant oet Grolloo. ‘Mien veurbeelden oet Grolloo binnen zo’n beetje dood. Teminnent Muskee en Brood wel. Nou bin ik aan de beurt.’ Tiedens de Dag van de Grunneger toal treedt Erik Harteveld op mit De Kopstubbers, n streektoalband oet Noord-Drenthe en Grunnen. De groep verwaarkt aigen Drentse teksten ien sums exotisch klinkende blues.

Om 14:30 kinnen ie lustern noar Irene Wilkens & Sikkom Kult. ‘Wat is der schierder as mìnsen verhoalen vertellen ien t dialect woarmit je opgruid binnen’. Zangeres Irene Wilkens en heur band Sikkom Kult doun dit op hail aigen menaaier. De aine keer raauw, aander keer melancholisch, sums laif of confronterend mor altied recht oet t haart, herkenboar en vanzulf nait te vergeten ien t Grunnegs. ‘Ik wil zingen wat ik mooi vien en doarmit hoop ik aander lu ook te roaken, emotioneren of te vermoaken’ aldus Irene. Lees meer…

As leste treedt om 15:10 High Temperature (Snikhait) op, swingblues oet t Oldambt. De band speult sinds 1998  joaren ’50 meziek mit veul blues en Boogy-Woogy. Van oorsprong binnen de teksten ien t Engels, mor vandoag-de-dag veuraal ien t Grunnegs. Ze zellen op de Dag vast wel wat nummers speulen van heur noagelnije cd ‘Mous’. Zanger en mondharmonicoaspeuler van de band is Herbert Herbie Grezel oet Winschoten. De vaste bezetten bestaait verder oet Martienes de Wit (pioano, Rhodes en örgel), Eric Bosma (bas en zang), Jasper Groen in ’t Woud (gitaar) en Gerrit Bruinink (drums). Lees meer…

Lees HIER t haile pergram van de Dag.

 

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

13 + 6 =

Terug naar boven ↑
  • Muziek activiteiten

    Geen nieuwe activiteiten