Column Jan de Jong, column

Gepubliceerd op 15 juli 2015 | door Webloug

0

‘Veteroan’ column van Jan de Jong

Veteroan

Doar ston e, stief en stram, keersrecht, achter ien n jeep. Swaarte blazer vol mit medallies. Ain haand brocht groet en aander hil hom stief vaast aan afuit van mitrailleur. Ainege en oldste veteroan dij nog ien leven was.
Hai is intied sneuveld heb k begrepen.

Veteroanen ien aal soorten en moaten marsjeren veurbie. Herdenkingen, bieainkomsten en vieringen. Eerd, op scholders klopt. Dank zai heur. En tante Lien zingt.

Nog haitied vechten. n Generoatsiekloof. Binnen echten en gain echten. n Oetzenden is gain oorlog. Hebben ie vochten? Nee? Din heuren ie der nait bie vienden gonnent.

Bouken doar nkander en de poletiek de moat meten wordt. Frustroatsies van de onmacht. Draaikonterij. Haalve, of gain woarheden. Veul veteroanen dij heur zulf van kaant moaken, veul ien n inrichten, veul ontspoord. Binnen gain sievers van zegt poletiek.

Oetmoakt veur leugenoar. Nait woar zegt n VN kemizzie. Foto’s, fotorolletjes kwiet. n Spreekverbod.
Tien joar noa tied ropt Den Hoag: ’Ie maggen ales zeggen. t Ligt poletiek nait meer gevuileg noar Israël. Wie ondervienden doar nou gain perblemen meer van. Mor bedenk wel dat joen boazen doar nait bliede mit binnen. En dat t joen toukomst wel ais ien weeg zitten kin.’

Nederlandse soldoaten dij tusken 1979 en 1985 bie de United Nations Interim Force ien Libanon zeten hebben kriegen noa prakkezoatsies van d’overhaid n droaginsigne Nobelpries VN militairen. Datteg joar prakkezaaiern. n ‘Inhaalslag’ hait dat.
Gain ains n echte medallie wordt ter roupen deur veteroanen. Kniepereghaid van d’overhaid.
Ìk huif hom nait. Retour ofzender.
Medallies. Elk mit zien aigen verhoal. Aal t blik votstopt maank lösse rommelpot ien n nachtkastjeloa.

Oom kwam weerom van Indië noa n poar joar. Hail femilie zat ter kloar veur. t Hoes was te klaain. Pa, moeke en oldooms en taantes. Oranjemannen doar t geleuf veurop marcheerde en keunegin haaileg was. Ien ofwachten van de verhoalen.
Oom kwam geliek veur n kruusverheur. Zo ien n hinderloag lopen.
Hai mos even pizzen. n Dag loater was e der weer.

Ien gedachten pak ik vief medallies van n plaank ien boukenkaast. D’ainegste medallies doar k wies mit bin. Wonnen deur mien vogeltjes op mien allereerste tentoonstellen ien 1965. k Was nog n dikke kwoajong. Mien vogeltjes heur medallies. Doar bin k nog haitied groots op.

 

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

2 × twee =

Terug naar boven ↑
  • Literatuur activiteiten

    Geen nieuwe activiteiten