Literatuur 150 psaalms vrij, huub oosterhuiis, marten van dijken

Gepubliceerd op 29 april 2015 | door Jan Glas

0

Verslag en foto’s prizzentoatsie ‘150 psaalms vrij’

‘Van toal, en veuraal van joen aigen toal, toal van joen haart, wor je nooit flaauw.” (Marten van Dijken)
Op zotterdag 25 april wuir in de Lutherse Kerk aan de Haddingestroade in Stad onder grode belangstellen de deur Marten van Dijken in t Grunnegs vertoalde ‘150 PSAALMS VRIJ’ van Huub Oosterhuis prizzentaaierd. t Wuir apmoal op n stemmege wieze lösdoan deur ds. Klaas Pieterman. Veurzitter Liudgerstichten. Hai las hierbie Psaalm 147 veur , dij aansloetend zongen wuir deur Schola Cantorum onder laaiden van Henk de Vries. Hiernoa kwam redacteur Jeanet Hamstra van uutgever Royal Jongbloed aan t woord. Zai vertelde over hou t bouk tot stand kommen was. Vertoaler Marten van Dijken sloot hier dou noadloos op aan en gaf op n hail kurege menaaier wat achtergrondinfermoatsie over alerhaande knelpunten dij n vertoaler bie zukswat in de muit kommen kin. t Was nou aan tied om t eerste bouk uut te langen aan de schriever Huub Oosterhuis, dij der slim verguld mit was. t Twijde exmploar was veur de schriever-dichter Tonko Ufkes, dij tiedens t vertoal en schriefproces hail sekuur mitlezen har. Henk Scholte, consulent Huis van de Groninger Cultuur, druig dou Psaalm 30 uut ‘150 Psaalms Vrij’ veur. Schola Cantorum voerde dou Psaalm 30 en Psaalm 65 uut. Hiernoa kwam Huub Oosterhuis aan t woord. En dij sprak over hou hai der tou kommen was om de Psaalms aigentieds te bewaarken. Hai gong doar bie weerom noar zien tied ìnd joaren viefteg dat e in de Stad touhuil. Hai waarkte dou veur t Maartenscollege en doar kreeg e in ains de slinger aan t schrieven en omtoalen van psaalms. Hai har dou nog nait in de goaten dat t kerwaai hail wat joaren zien beslag zol nemen. Aan t ende van zien verhoal har e n aigenschreven Grunneger gedicht mit onze inslikte ennen. Hai sloot òf mit n n ode aan ons onvolprezen Martinitoren. Schola Cantorum sloot t of mit Psaalms 119, 138 en 150. Boukhandeloar Jan Riemer sloot de nommedag dou òf.

Bekiek HIER t fotoverslag van de prizzentoatsie.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

5 × 2 =

Terug naar boven ↑
  • Literatuur activiteiten

    Geen nieuwe activiteiten