Column Jan de Jong, column

Gepubliceerd op 21 maart 2016 | door Webloug

0

‘Verrazzens’ column van Jan de Jong

Verrazzens

Dag begon mit t oetlangen van n bouk op Dag van Grunneger toal.
Vertoaler van biebel haar nog n sprookjesbouk vertoald. Grimm ien t Grunnegs.
Oetgeven deur Stichten t Grunneger bouk, dat oetgevers ien kontraain slagt schrik ien de bainen.
Hou kommen zai dommee aan heur manuscripten van Grunneger schrievers.

Veur elk was der wel wat te doun. Te veul om te neumen.
Toch vil der wat op. k Zag ook wat eernsachtege gezichten en heurde wat eernsachteg proaten.
t Was glad drok bie aal lezens over ons Grunnegs.
De bek vil mie lös. Hoogleroar, perfester ien Vraise toal en letterkunde, en nog veul meer, Goffe
Jensma dij ons sitewoatsie oetstukte van t Grunnegs op dag van vandoag. n Vrais. En hou.
Hou zai mitnkander boudel aanpakken goan. Nait willen, nee, goan. Soamenwaarken mit Bero
Grunneger Toal en Cultuur en t Huis van de Groninger Cultuur. Hai nuimde Eddy de Jonge, boas van t
Huis en lait n petret zain van ons nije streektoalfunctionoares Ingeborg Nienhuis. Hoog op t peerd.
Lady Godiva heurde k ain zaacht zeggen. No gaait dat eefkes te ver. Ons streektoalfunctionoares haar
dudelk meer om t lief. Ik docht meer aan Jeanne d’Arc.
Mor, noa n vroag over t schrieven ien t Grunnegs kreeg k moud. Zai binnen ook van mainen dat aan t
schrieven ien t Grunnegs meer aandacht besteed worden mout. t Schrieven over ons doagelks doun. En
nait te vergeten dag van vandoag. t Kin toch nait de bedoulen weden dat wie zeggen noa n haalf aiw
dat ter niks schreven is. Veur de goie verstoander, niks oetgeven is.

Mien dag kon nait meer stukkend. En t was nog nait doan. Geweldeg nijs aan t ende. Allewel,
voetbaalploug ‘Bravery Nova Zembla’ krigt n stoer joar. Niks nait voetbalen. Ons Fieke krigt n potje.
n Glimmende aanstoande moeke zulf zee mie t en vanzulf is aanstoande pa ook bliede. Is allinneg wel
ain ding. Pa rekent aigliek n beetje op n technisch wonder. Ook Fieke liekt dit wel handeg. k Heb
heur baaident ais goud aankeken. Ik hoop t ook.

Grunnegers onder nkander.
Wat n organisoatsie, zo’n dag. n Knap stuk waark, van aal dij doar aan mitdoun. Stief bedankt.
n Dag dat k vernijs mitdoun mog en kon.
Sums binnen wondern wereld nog nait oet.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

vijftien + 19 =

Terug naar boven ↑
  • Literatuur activiteiten

    Geen nieuwe activiteiten