Column Jan de Jong, column

Gepubliceerd op 28 september 2015 | door Webloug

0

‘Verd…’ column van Jan de Jong

Verd…

Hè. k Trek scholders op en rol heur hinneweer. Intied kiek ik op thermostaat.
19 groaden. Brrrrrr. Verrekte vlouerverwarming ook. Wel makkelk, mor k heb ter niks mit.
Nait meer mit gat veur kaggel, of tegen verwarming. Handen der bie holden. Of mit hozevörrels
der tegen aan.

Mit bainen stief tegen nkander kroep k ien n bult op baank. Vrouger spoukt.

n Rikje mit wasgoud. t Behang riegelde van muren en t wotter luip ien stroalen bie t glaas laangs.
Muvvege roek en aanbakken goud as t rikje weer ais tegen kaggel valen was.
n Scharreltied doar heur waarmte mie nogal ais ontdeuen mos noa n oavend zitten bie n tochtend,
enkeld glaas doar de bloumen dik op stonden. Aanstoande schoonpa ain kaant en zai aanderkaant kaggel, mit dikke rooie koppen.

Wor k nou n krimpert? n Jeuzelkont?
t Is bienoa negen uur. Aanderkaant glaas is t schier noajoarsweer.
Ik kom ien de bainen, pak fototoustel en ien schuurtje stevels en n jas.

Wied achteroet zet k fiets tegen n daampoal.
Diezege flaren trekken over t laand. n Leutje wereld ien dompege stilleghaid. Wilgen en t raait
druppen. Wiedvot housten en koggeln schoapen. Oet niks komt mit troage slag n raaiger en
schraauwt n moal of wat.
Ik moak wat ploatjes. Troag trekken flaren wieder, zakken eefkes omdeel of verswienden noar naarns.

Ik struun nog n uurtje rond. t Lief en t gemoud vernijs op temperoatuur.
Weerom blief k stoan bie n boerderij. Floddert n wotterpiekje oet kaant van gracht vot. Roek van mis
en koelgras. Hè, k bin glad weer ien beeld. k Betrapte mie onderwegens zulfs op n fluitje.
k Snoef nog ais daip. Roemte.

‘Most ais kieken.’ Vraauw het tillevizie aan.
Waarmte slagt mie ien de muid. Ik leg fototoustel op toavel.
n Laange rieg minsken, ien dekens vollen, sjaauwen ien n graauw druppend laand tusken maisvelden deur. Gain ènde ien zicht. Bepakt en bezakt. Ol minsken holden nkander in de bainen. Leutje kiender,
summegen op zokken en potjes stief ienpakt op aarm. Holle, vroagende ogen.

Vraauw lopt noar keuken. ‘Wilst ook kovvie? Ook ol wieven?’
Vroren aan t beeld zet k gat op baank.
‘Ík vruig die wat!’

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

13 + twintig =

Terug naar boven ↑
  • Literatuur activiteiten

    Geen nieuwe activiteiten