Algemeen Klaas Staal

Gepubliceerd op 10 juni 2016 | door Jan Glas

1

Veendammer vörmgever en uutgever Klaas Staal uut tied kommen

Veendammer vörmgever en uutgever Klaas Staal is uut tied kommen.

Klaas ston aan de waige van de baaide grammefoonploaten van zien achternoamgenoot Ede Staal.

De LP’s , ‘Mien toentje’ en ‘As vaaier woorden’ waren der meschains nait west as Klaas zuk der nait mit aanbemuid har. Hai was n goie vrund van Ede en har deur zien affeer n goie kiek op vörmgeven en marketing en zo richtten ze mit heur baaiden heur ploatenlabel ‘Mollebone Music’ op. Noast Ede zien succesvolle produkties brochten ze ook toudestieds ploaten van de Askay brothers, Alex Vissering en de Tuutjefloiters op heur label uut. Klaas was in de joaren tachteg ook aine van de oprichters van stichten ’t Grunneger laid’, dij zuk tot doulstellen har, d’Grunneger meziekwereld wat meer op n hoger plan te brengen. t Grunneger laid, organiseerde toudestieds bieainkomsten en n aantal waarkwinkels veur laidjesschrievers en brochten dou ook n dubbele LP van Lianne Abeln ‘Verskes dij k joe lain’ en n LP ‘Midwintertied’ mit Grunneger Kerstlaidjes uut. Wieders organiseerde dizze stichten in 1986 ‘t Eerste Grunneger Song festival’.

Om alles goud op gaang te kriegen was e aan t ènd van de veurege aiw ook ain van de grode aanjoagers van t joarliekse Tuutjefloitersfestival. Noast meziekuutgeverij was e ook de man van d’uutgeverij ‘Mollebone Literair’, (loater uutgeverij Staalboek) dij onder aandern ale bouken van Kees Visscher en t nou nog slim populaire Grunneger buutswoordenboukje van Siemon Reker uutgeven het.

In 1989 richtte hai mit Harm van der Veen d’aalgemain Grunneger culturele stichten Kostverloren op, dij zuk ook op alerhaande menaaiern bezegholden gong mit t aanpeerdjen van zo’n braid meugelk palet Grunneger cultuur. Dizze stichten is aiglieks spontoan ontstoan deur n boycotactie rondom radio Noord in t joar 1988. t Gevaal was, dat t popelaire radiopergram ‘Sloaperstil’ van Siemon Reker van de ether mos en dou wuir der in t kerkje van Wij n alternatieve radioshow opnomen.

Klaas zien haart gong van stond of aan hail dudelk uut noar d’audio-visuele kaande en t vastleggen van literatuur, meziek en historische beschaauwens op band en t verspraaiden doarvan. Mit noame veur aal dij lu dij muite hebben mit t lezen van Grunneger teksten, en boetendes was der dou noar aigen zeggen ook veuls te min aanbod van Grunneger streektoal veur visueel gehandicapten. Lu van Kostverloren brochten studdie aan n haile riege kassettebaandjes en video’s uut van Grunneger schrievers en muzikanten. Der wuiren ook grode culturele manifestoatsies deur Kostverloren uut stro zet, dij din as vanzulf ook weer op baand vastelegd wuiren en ter beschikken steld aan lokoale, zaiken- en regionoale omroupen.
Klaas was in zien tied op alle fronten in t Grunneger wereldje ain van dij weurege en pozetieve, dij overal wel wat gouds in zag en hail voak din in zien enthousiasme derover broesde van ideeën en aandern ook mitslepen kon.

De leste joaren was t schaande genogt aal stiller rondom Klaas worden. d’Ains zo actieve man kreeg dik acht joar leden te kaampen mit n slimme zaikte en verswon doardeur wat op d’achtergrond.

Op moandag 30 maai is dizze leutje, mor o zo markante man op 74 joarege leeftied in Veendam uut tied kommen. Klaas is op 3 juni in besloten kring cremeerd.

Tags:



One Response to Veendammer vörmgever en uutgever Klaas Staal uut tied kommen

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vijf × 5 =

Terug naar boven ↑
  • Activiteiten