Muziek twij deuntjes, de koning en de dame

Gepubliceerd op 4 februari 2015 | door Jan Glas

0

Vanoavend 4 feberwoarie De Koning en de Dame live in Twij Deuntjes

Woensdag 4 feberwoarie live muziek in Twij Deuntjes: De Koning en de Dame, Wouter de Koning en Rika Dijkstra mit de nije pazzipanten Winnie Pollard en Jacob van Ringen. We goan mit dizze lu ais muzikoal, of t nou hait is of kold, aan de riddel en moaken mit heur n haile laange wonderlieke Ommelaandse raaize.

t Is alweer 16 joar heer dou ze mit n d’Grunnegstoalege spaigelploat ‘De koning met de Dame – Vrumd Volk’ op de proppen kwammen. Doaropvolgend kwam ‘De koning met de Dames en Heeren – Wies mit die’ en doar is t eefkes bie bleven. Ze hebben vanzulf mit heur twijbaaident nait stille zeten en binnen nou weer n oaventuur aangoan mit zangeres en klarinetspeulster Winnie Pollard en gitarist Jakob van Ringen.

Wie dochten t is aan tied om weer ais bie te proaten. Ik kin joe vot al zeggen davve vanof d’eerste noot tot de leste uutklaank van aal dij roemtelke mooïeghaid, dij ons deur heur veurschuddeld wuir slim onder de indruk waren. Zo as dat wel ais mit meziek gaait, der ontstaait deur goie soamenspul inains wat, dat lopt inains as vanzulf van ons vot en komt ook zo mor weerom. t Is din asof t noeit aans was. Zukse momenten haren we verschaaiden keer bie dizze opnoame-sessie. Zukswat ervoaren je din as n groot kedo, dij je loater mit joen luusteroars mor aals te geern dailen willen.

Doar schut mie din wel in t zin, dat n Grunneger wel ais wat schuchter is, benoam as e n kedo krigt, din wordt der wel ais zegd, ‘Dat har ja nait huft’ of ‘dat haren je nait doun mouten’. Wie hebben t in aalsgeval geern aannomen. Rika en Wouter binnen in heur waark hail veulziedeg en hebben aaltied al n fiene neuze had veur goie teksten en melodieën. Aine van heur vaste tekstschrievers is sunt joar en dag Jan Siebo Uffen, dij zo studdie aan in Grunnen wel ain van de maist produktieve schriever van laidteksten is.

Rika zingt van hom hail septiel t mooie waigelaid ‘Al ben ik bang’. Noast oorspronkelke teksten is Jan Siebo ook hail sekuur as t om t omtoalen van aandermans waark gaait. t Laid ‘Laifde op joaren’ van Jaques Brel is din mit recht n pronkjewail worden en Rika het doar in heur vertolken n haile aigen invullen aangeven.

Verder stoan we ook stille bie de muzikoale Scandinoavische roots van Rika. Zai het noamelk n zet in Göteborg touholden en vandoar dat ze doar ook n haile goie kiek op het en veur ons as n bruggebaauwer te waarke gaait. Ain van heur veurbeelden uut Zweden is din ook de grode troubadoer Evert Taube, dij wordt in Zweden zain as n nationoale dichter. Hai het hail veul laidjes schreven en ook zulf vertolkt. Weeromkerende themoa’s bie hom binnen bievubbeld t leven op zee, de Zweedse natuur en oavontuur in verre landen aan vremde kusten. Zien pakkende laidjes binnen volgens Rika hail populair in Zweden en worden nou nog voak zongen. Rika zingt van hom de klassieker ‘Såskimrandet var aldrig havet’.

Rika het ook wat mit aandere toalen en gaait smui van t Hoogelaand van Ede staal as n besloet over noar t Chlieense ‘Gracias a la vida – Jag vill tackr livet’ van Violeta Parras Gracias en de Finse zangeres Arja Enni Helena Saijonmaa. Zo zit je din in de pampa’s en raaizen zunder aarg wieder noar de scheren veur Stockholm. Rika, Wouter, Winnie en Jakob nog stief bedaankt veur aal dij mooïeghaid.

Speuliest van dizze week is HIER te bekieken.

(Foto © Henk Scholte)



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vijf × 3 =

Terug naar boven ↑
  • Muziek activiteiten

    Geen nieuwe activiteiten