Column Jan de Jong, column

Gepubliceerd op 3 september 2015 | door Webloug

0

‘Van lèg’ column van Jan de Jong

Van lèg

Joa hur, moeke zet bainen noast bèr. Noa vernijs n naacht vruzzeln zel t weden. Ik trek gaauw dekbèr over mie hìn. Brrr, niks nait te waarm.
Deur van sloapkoamer mout lös en ien ain roam deur t glaas ook. Woagenwied. Oren wappern mie gewoon aan kop. Ik kroep ter aan neus tou onder.

Zai gaait op t dekbèr liggen poesten.
Mit n schaif oog gloep k op t wekkertje. Nog mor net vief uur.
‘Joa, zo loat is t, hest goud zain?’ Vernijs goan bainen der noast en boundert zai trap òf en heur k koelkaastdeur ien keuken. Mit n dik stuk keboal runt hond trap op en springt op bèr. Deur beneden nait dichtdoan vanzulf.
‘Wat dut dij hond hier.’ Zai knipt t licht aan en zet n vlès op t nachtkastje. ‘k Wil hom nait op bèr hebben. Ain en aal onrust. Breng hom mor noar beneden.’
Ik geef t op. Dit win ik toch nait. Din der mor oet.

As k achterdeur op slöt dou kiek k eefkes noar boven. t Roam is weer stief dicht. Dat is weer vroug pizzen gap k tegen hond.

Weerom eerst kovvie en n stoetje. Mor ais achter kompjoeter, wat googeln.

Vraauwen hebben t voaker kold as mannen. t Vet is bie heur geliekmoateger over t lief verdaild. Ong? Handen en vouten kriegen minder bloud en hebben t voaker kolt. En lichoamstemperetuur is ain groad leger. En zai heuren beder as mannen. Luustern staait ter nait bie! t Is omreden heuren of potje ook jankt.
Oestrogeen nemt òf en testostoron nemt tou. Vergeetachteg en stemming wizzelt nogal ais.

Wat aarg. n Dikke toezeboudel.

t Is doan mit de rust. Koamerdeur gaait lös. ‘Wat hest aal n lewaai.’
Ik kiek over laptop.
Twij rooie waangen en n poar grode verwilderde ogen kieken mie aan. ‘Wat is der, wat hest!’
Ik kom ien de bainen, geef heur n doetje en striek heur eefkes over rug. ‘Kovvie, laiverd?’

Vraauwen worden onofhankelker en agressiever lees k. Oere. En zai kinnen ook nog ais n snor kriegen.
Ik duur hoast nait, mor verzichteg kiek k hail eefkes oet zied.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

5 × 2 =

Terug naar boven ↑
  • Literatuur activiteiten

    Geen nieuwe activiteiten