Column Chris Kiel, column

Gepubliceerd op 31 augustus 2015 | door Webloug

0

‘Valwind’ column van Chris Kiel

Valwind

Roar weer is t van t joar. Van t winter wol t nait vraizen, van t veujoar wol t nait goud deu worden en in juni brakken slakken ale snelheidsrecords en ze vratten nog haarder omdat ze anders doodgingen van kolle.

Mor t oetzunderlkste dit joar is de wind.
Eerst dij störm van 25 juli. Wat n gekkenboudel.
Mor nog veul gekker, al is der nait zoveul over in t nijs west, was swoensdags doarnoa de valwind in Brij. Ik was der even loater vlak bie langsfietst en heurde in Bavveld dat doar n windhoze hoesholden har. Roar von ik dat, want ik har niks zain.
Dat was drij doage eerder, dou k der noa dij störm op skeelers langskwam wel anders west. Overal blad en takken op weg, t was slim oetkieken om nait te valen.
n Poar kilometer wiederop, bie Raskerd, woar niks meer op weg lag, vuil k toch nog. Kop en knijen vol bloud. Onbegriepelk.
n Poar doage loater wörden de roadsels oplöst: t was gain windhoze west in Brij, mor n valwind. Eerst wol k t nait leuven: bie valwinden heuren baargen har k altied docht en den kriegen je n föhn mit lawines en zo. En nou het Brij wel n hail mooie wierde mit dat pittoreske kerkje, mor je kennen t onmeugelk baarglaand nuimen.
Noader onderzuik helderde t ain en ander op. Van Daale en Google zeggen, dat t n valwind loodrecht noar beneden valende lucht is. Dat ken ook as der gain baargen binnen.
Dat harren ze in Brij had. Ik twievel der nait meer aan. Dikke takken knapden as lucifers van de bomen en vuilen omdele.
En drij doage eerder mout dat bie Raskerd (mit n hail mooie wierde en n pittoreske iesboane) op klaaine schoal ook gebeurd wezen, al is doar hailemoal niks van in t nijs west. Doar twievel k ook nait aan. Want ik vuil of k nog nooit skeelerd of scheuveld har.
En dat overkomt mie nait bie n störm, ook nait bie n windhoze.
Dat t mout n valwind west hebben.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

8 + zeventien =

Terug naar boven ↑
  • Literatuur activiteiten

    Geen nieuwe activiteiten