Column Tonko Ufkes, column, goed lek

Gepubliceerd op 24 april 2015 | door Webloug

0

‘Uutverkoop’ column van Tonko Ufkes

Uutverkoop          

Voak kin ik t veurkommen, mor vandoag kwammen mien vraauw en ik toch deur de Herestroat. En of t zo weden mos, host geliek waas t roak:
‘Oh,’ klonk het noast me, ‘oh, wat n mooi rood vest het die pop aan en dizze winkel ken ik nog niet! Blief doe hier eefkes ien boeten wachten en eh, niet votlopen hur.’ Met dat ze t zeid har, verdween ze noar binnen.
Geduldeg bleef ik stoan, noast e paspop met dat rooie vest en ok al mos k vast nog 10 menuten wachten, ik ging niet noar de boekewinkel tegenover. Ien alle rust heb k wat om me hìn keken; noar de winkelende mensen, de gevels, de stadsdoeven.
Noa n zetje kwam n verkoopster uut e winkel en ritste t vest van e paspop noast me lös. Bliekboar keek ik nogal verboasd want ze begon uut te leggen dat n klant noar juust zo’n vest vroagd har. Ah, dat kwam me bekend veur en dat wol k tegen de verkoopster zeggen, mor ze waas al weer vot – met het vest.
De paspop noast me bleef gewoon stoan, ien n fleurege rok mor nou zunder bovenkleren.
Net toen k bedocht dat k nou beter ok noar binnen goan kon, zag k mien buurman aankommen, hij gnees van oor tot oor: ‘Zo, stijst op wacht bij twee stevege …’ heurde ik hum nog zeggen, veur k de winkel ienvluchtte.
Mien vraauw waas krekt an t òfrekenen, ze droeg het rooie vest. ’t Past precies,’ glunderde ze.
‘Dat har ik al laang zien,’ zee k noar woarheid.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

3 × 4 =

Terug naar boven ↑
  • Literatuur activiteiten

    Geen nieuwe activiteiten