Column column jan glas

Gepubliceerd op 22 januari 2015 | door Webloug

5

Twij moal

Ik goa geregeld noar pedicure, ik heb minne vouten dij wel wat laifde bruken kinnen, en dat kriegen ze bie heur. Mit pedicure heb ik t mainsttied over eten en de algehaile schofterghaid. Ze is van oorsprong Duuts. Ik geniet altied van heur lichte accent, veuraal as ze heur wat kwoad moakt (over de schofterghaid vanzulf), ik heb n zwak veur t Duutse accent. Dit moal ging t exclusief over eten, sunt kort mot ik reken holden mit wat ik eet, wat ienholdt dat ik gewoon gezond eten mot, wat elk aiglieks mot. Toch zigt wat ik tegenswoardeg op lopende baand van kassa leg der voak hail aans oet as wat andern der op smieten. Minder is t, veuraal veul minder koolhydroaten.

Over eten ging t dus bie pedicure, ik mos Witte Cashew Pasta perbaaiern, want: ‘Als je dat eet is het net alsof je in een villa woont.’ En ze het geliek, pruifde ik. t Is nait gekoop, dat zel wel mit dij ‘villa’ te moaken hemmen.

Noa pedicure mos en zol ik nog even de ‘FINAL SALE’ ien summege klerenzoaken bie laans. ‘Waarkstoe nou hier?’ zee ik tegen n verkoper, ‘nait meer ien dij zoak aan Ebbingestroat?’ Nee, dat was zien twijlingbruier, zee e, ik was nait de eerste dij dij vergizzen maik, veuraal omdat ze baaid ien n klerenzoak waarken. ‘Goh, wat biezunder,’ zee ik. k Heurde dat hai, net as zien twijlingbruier, n beetje stöddert. Ik heb n grode zwak veur stödderoars, want ik stödder zulf ja ook. ‘Joe lieken hail veul op mekoar,’ zee ik.

Toun nog even noar de biologische slager. Wat is dat vlees duur, docht ik bie t ofreken. Toun ik thoes was zag k dat ik summege dingen dubbel kregen haar. Dat gebeurt mie as stödderoar wel ais voaker, dat ze mie dubbel verkopen. Gelukkeg kin ik boudel ienvraizen.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



5 Responses to Twij moal

  1. Aly Freije says:

    en dast din alles twijmoal krigst dat is toch mooi in t leven

  2. Aly Freije says:

    En dast din alles twijmoal krigst..

  3. Jan de Jong says:

    Ong? Haar dij biologische slager ook n twijlingbruier?

  4. Jan Glas says:

    Dat zol wat wezen, Jan.

  5. Anita & Pia says:

    Vanmiddag verkocht ik nog 2 x Opa en oma Pluis (1 x Fries en 1 x Nederlands, dat wel) aan een stotterende meneer. Gelukkig had hij ze zelf van de plank gehaald……..

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

5 + 17 =

Terug naar boven ↑
  • Literatuur activiteiten

    Geen nieuwe activiteiten