Column Jan Glas

Gepubliceerd op 7 september 2016 | door Webloug

3

‘Twij lege stoulen’ column van Jan Glas

Twij lege stoulen

Ik zol n oproup kriegen veur n hazzenscan. Op moandag was linkerhelft van mien gezicht ienains verlamd, dinsdag kreeg ik van hoesarts te heuren wat ik zulf al op internet vonden haar: zaikte van Bell. Woarschienlek, want t zol ook nog n klaaine hazzeninfarct wezen kinnen, vandoar dij scan. Vrijdag laip ik ien Butjesstroat dou tillefoon ging, UMCG. Of ik zundagoavend om kwart noa tien kommen kon veur de scan. Zundagoavend? vroug ik noadrukkelk articulerend, want mond waarkt mor veur hèlft, net of ik links n tandartsverdoven heb. Joa, t scannen gaait weekends en soavends gewoon deur, aans kin nait elk aan beurt kommen.

Roare dag, zundag, k hing aal wat om en was onrusteg. k Heb mien annus horribiles* wat t lief betreft, k laag drij moal ien t zaikenhoes en de aine noa de andere penicillinekuur sleupte mien daarms.
Op n tiedstip dat n fesounlek mìns pyjama aanschut en tanden bozzelt fietste ik noar t zaikenhoes. Allain. Elk wil wel mit mor dat huft nait veur mie, ik wil nait aal proaten over hou t is en gaait, mie nait tot ain verholden. Get it over with, denk ik altied mor.
Of ik metoal ien t lief haar, lözze onderdailen ien mond? Nee. Op onderbroek en sokken noa oetklaiden. Ik kreeg n dekentje over, n kap over kop en n infuus mit radioactief goudje ien rechteraarm. Of ik noar muziek luustern wol, scan zol zo’n 35 minuten duren. Radio 4 leek mie wel wat. Mit koptillefoon op schoof ik naauwe scan-apperoat ien.
Ik hol van klassieke muziek mor bin gain laifhebber van t kloavecimbel, ain nummerke trek ik nog wel. Nou was t juust net t kloavecimbel-uurtje op Radio 4. Der wer op t instermint hoamerd dat t n laive lust was, aine etude noa de andere, mit n voart of leste traain nog hoald worden mos. Zo’n scan moakt ook nog ais n hels keboal, asof der noast joen kop ien beton boord wordt. Barok en betonboor vochten om mien aandacht. Ik kon gain kaant op. Ain moal tiedens dij 35 menuten kwam der n hail klaain golfke claustrofobie opzetten, mor dat kon ik votdrukken:
Ien kap over mien gezicht zat n spaigelconstructie, op zo’n menaaier dat je nait noar boven keken mor noar iengang van scankoker. Tegenover dat gat stonden twij stoelen, zo kin n kiend bieveurbeeld zien olders zitten zain. Veur n kiend is zo’n scan n hel vanzulf en din is t n geruststellen dat pabbe en mamme doar zitten. Ik zag twij lege stoulen. Get it over with, docht ik.

* Annus horribiles

Tags: , ,



3 Responses to ‘Twij lege stoulen’ column van Jan Glas

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

een × vier =

Terug naar boven ↑
  • Literatuur activiteiten

    Geen nieuwe activiteiten