Column Tonko Ufkes, column, goed lek

Gepubliceerd op 13 juli 2016 | door Webloug

1

‘Twee vraauwen’ column van Tonko Ufkes

Twee vraauwen

Voag heur k Ria hieltied proaten met e jonge vraauw die noast heur zit, mor och, zo vlak veur t concert wordt overal proat. Zulf doe k zuks nooit; net as nou luuster ik groag noar t zoemen van al die stemmen. t Is n soort veurprogramma en flarden van verskes speulen al wat deur mien kop: n nummer van de eerste cd die we van dizze zanger kochten en n mooi lied ien t Oafrikoans zweven veurbij.
Om ons toe doven de lichten van e Schouwburg, de stemmen zwiegen en ik doe de ogen haalf dicht en leun noar achtern.
‘Doe,’ prikt Ria me onverwacht ien e zied, ‘kinnen we ok ruilen van plak?’
‘Hè?!’ Dat wisseln van stoel moakt me niks uut, mor de meziek begunt zometeen en k waas der net goed veur goan zitten. We wringen om nkander toe en as we weer zitten vuul k Ria’s haand ien mienent.
‘Doe liekst sprekend op de pappe van die jonge vraauw en doarom wil zij groag noast dij zitten bij dat ene lied,’ fluustert Ria zaacht.
Best, en ik kniep eefkes ien heur haand.
‘Misschien dat zij juust dan even tegen dij aanleunt en niet tegen heur vriend,’ gijt Ria deur. ‘Moest dat geworden loaten, hur.’ Met heur lippen roakt ze mien linkeroor.
Vannijs kniep ik eefkes.
Dan zwaaien de gerdienen van t podium open en achter n grote vleugel zit e zanger kloar, hij knikt noar ons en let e vingers over de toetsen lopen. Noast mij wordt de intro bliekboar meteen herkend: veurzichteg schoeft e jonge vraauw op mien schoot.
Ria vòlt mien ene aarm om dizze vraauw, de aander aarm doe k dan zulf.

Tags: , ,



One Response to ‘Twee vraauwen’ column van Tonko Ufkes

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

2 × 2 =

Terug naar boven ↑
  • Literatuur activiteiten

    Geen nieuwe activiteiten