Algemeen

Gepubliceerd op 24 maart 2014 | door Webloug

0

Trijny Schmitz Du Moulin-Dijkema ‘Looste Grunneger 2014’

n Verslag deur Henk Scholte.


Goud nijs: Trijny Schmitz Du Moulin-Dijkema uut Delfziel kin zuk vanof 21 meert 2014 de aller-Looste Grunneger nuimen. De pittege kwis wuir zotrekend deur d’old leroares Fraans mit n staark Grunneger achtergrond mit mor vief fouten van de viefteg toalege vroagen glaansriek wonnen.

In Meertmoand Steektoalmoand Delfziel extroa aandacht veur de Fraanze tied in reloatsie tou de Grunneger toal en cultuur. In t allerlooste Lösdörp in Dörpshuus de Bongerd wuir op 21 meert de kunde van t Fraans in de Grunneger toal op n luchteg mor wel hail dege menaaier in de vörm van n kwis uuttest! Presentator en soamensteller van dizze kenniskwis was op dij oavend Fré Schreiber. Hai wuir dou moreel biestoan deur Henk Scholte, consulent van het Huis van de Groninger Cultuur, dij as kundege en ainege jurylid commentoar leverde op de dailnemers en heur loze kunde en onkunde. Mit n dikke smaigel noar ‘De slimste mens’ mit dit onderschaaid dat elkenain dij zukzulf der loos genogt veur von, mitdoun kon. De dailnemers kregen viefteg goud deurwrochte vroagen veurschuddeld. t Was aiglieks volgens de kwismaister nait aal te stoer, mor toch haren lu zoas dat bie n kwis heurt, der bie zetten toch nog wat muite mit. De hoofdpries waren koartjes veur d’leste veurstellen van t theoaterspektoakel ‘De laatste vriend van Napoleon’.
‘Muzikoal was d’oavend ook dik in odder, want de Damster tekstschriever en troubadour Hans van der Lijke, vrizze winnoar van de K. ter Laanpries 2013, luusterde d’oavend op hail aigen wieze chanson-moateg op.

(Bovenste foto: Trijny Schmitz Du Moulin-Dijkema (r). foto’s David Woltinge)

Tags: , ,



Reacties zijn gesloten

Terug naar boven ↑
  • Activiteiten