Algemeen

Gepubliceerd op 10 september 2013 | door Webloug

1

Tonko Ufkes over Gjaltema’s Langeleegte

Ainmoal ien de moand schrift schriever en dichter Tonko Ufkes n column over Grunneger zoaken ien t Dagblad van het Noorden ien de rubriek ‘Grunnegs Goud’. 27 augustus ston dit stukje ien kraant, schier veur wel Dagblad nait het.


Gjaltema’s Langeleegte

Ien Veendam is t betoalde voetbal verdwenen en dat is schande, veural ok omdat de noam van het voetbalveld zo biezunder is: “Gjaltemastadion aan de Langeleegte”. Krekt hier zit de wereld aan Grunneger toal.

Vanolds hiette t voetbalveld van Veendam de “Langeleegte” mor loater wer ok de grote geldschieter Gjaltema vernuumd: n mooi streektoalwoord en n Westerketierder femilienoam. En dus kommen Oost- en West-Grunnen soamen op één plak!
Het Grunneger woord ‘leeg’ stijt tegenover t woord ‘hoog’, denk mor aan de dörpsnoamen Leegkerk en Hoogkerk. Het sportpark “De Lange Leegte” lijt aan e westkaant van Veendam, ien e polder het Westerdiep en wel n hoogtekoart der bijpakt, zigt dat t doar slim leeg is. En ien Veendam is t gewoon ‘leeg’ en niet – op zien Hollands – ‘laag’.
Nou de noam Gjaltema; die achternoam liekt misschien Fries mor komt veural veur ien e Fries-Grunneger grensstreek. Want ok achternoamen heuren nog altied bij n bepoald dörp of ien n bepoalde streek, kiek t tillefoonboek der mor op noa. Zo nemmen b.v. ien Onstwedde zo’n 30 huusholdens de tillefoon op met: “Wubs”, mor ien t hiele Westerketier is amper n Wubs te vienden.
n “Gjaltemastadion” ien Veendam of woar dan ok ien Oost-Grunnen is hiel vremd, want nargens komt die achternoam veur; niet ien Veendam of ien Winschoot of op t Knoal. n “Gjaltemastadion” heurt eileks ien Moarum of Grodegast en veural ien De Penne [Opende]. Juust ien dat lutje grensdörpke, en verder Frieslaand ien, speulen de Gjaltema’s heur echte thuuswedstrieden.

Tonko Ufkes

(Foto: Jan Groenbroek)

Tags:



One Response to Tonko Ufkes over Gjaltema’s Langeleegte

Terug naar boven ↑
  • Literatuur activiteiten

    Geen nieuwe activiteiten