Literatuur

Gepubliceerd op 1 mei 2013 | door Webloug

0

Tonko Ufkes ‘Groots in Groningen’

Ainmoal ien de moand schrift schriever en dichter Tonko Ufkes n column over Grunneger zoaken ien t Dagblad van het Noorden ien de rubriek ‘Grunnegs Goud’. Op 23 april ston dit stukje ien kraant, schier veur wel Dagblad nait het.

Groots in Groningen                                                            
Ien meert wer as ‘schierste woord’ ien t Grunnegs kozen veur: “snoetjeknovveln”, met as goeie tweede t woord “mieghommel”. Veural dat “snoetjeknovveln” valt geregeld ien e priezen; de veurege moal waas dat op 10 oktober 2012. Toen kwam met t ientypen van dat woord de website www.groningsonline.nl ien e lucht: het digitoale buuswoordenboekje van Siemon Reker.
Ien meert waas ok de boekeweek en kregen we vergees t boekje De verrekijker schreven deur Kees van Kooten. De twee ‘schierste woorden’ ien dat boekje bennen veur ons de woorden “groots” (bl. 92) en “krek”(bl. 79). Misschien lieken ze echt Grunnegs, mor t blieken dus ok Hollandse woorden te weden. “Krek” komt eileks van t Franse woord ‘correct’ en t het zien weg vonden ien t Hollands, Fries enz. Veul meer woorden, bv. ‘sekuur’ en ‘dieverdoatsie’, goan terug op t Fraans en voak zulfs op t Letien. Veural t woordenboek van Helmer Molema geft duudlekheid over de oorsprong van Grunneger woorden.
Ien t boekje van Kees van Kooten stijt host onderaan bl. 92: “Omdat mijn vader daar zo groots op was” en ienderdoad, van t Hollandse woordenboek van Van Dale tot de Grunneger woordenboeken; ze hemmen aalmoal t woord ‘groots’. t Betekent ‘tröts’ en dat maggen we rusteg weden, op alle woorden die van binnen en van boeten kommen.

(foto: Patricia Ottay)

Tags:



Reacties zijn gesloten

Terug naar boven ↑
  • Literatuur activiteiten

    Geen nieuwe activiteiten