Algemeen

Gepubliceerd op 30 september 2013 | door Webloug

0

Tonko Ufkes ‘Brij en Doord’

Ainmoal ien de moand schrift schriever en dichter Tonko Ufkes n column over Grunneger zoaken ien t Dagblad van het Noorden ien de rubriek ‘Grunnegs Goud’. 24 september ston dit stukje ien kraant, schier veur wel Dagblad nait het.

Brij en Doord
Al weer n schofke kinnen we goed noar Brij en Doord kommen op e fiets, want noar beide plakken lopt n fietspad. En niet zomor padjes, nee, ze bennen vernuumd noar n Grunneger dorp.
Vlakbij t dörp Waarvum [Warffum] lijt t dörpke Brij [Brede]. Tussen hoaken stijt hier de ‘Hollandse’ noam en dat is neudeg: om n Grunneger dörp te vienden kieken we meest op n koart, op verkeersborden of bruken de Tom-Tom. Dan rieden we makkelk noar Warffum of Brede mor kommen niet noar Waarvum of Brij. Gelukkeg is dat nou dus aans worden.

Ien t dörpke Brij stijt n börg, de Breedenbörg. De noam ‘Breeden’ geft al aan dat t vervoegen lasteg is; t is gien ‘Breedebörg’ mor ‘Breedenbörg’, met de letter ‘n’ der bij ien. n Stroat of n diek die noar dit dörpke lopt, hiet op zien ‘Hollands’ misschien ‘Breederloan’, al zol  ‘Breedsterloan’ ok kinnen want der is n ‘Breedster Oude(n)dijk’. Op zien Grunnegs is t veul makkelker; we rieden deur n ‘Brijsterloan’ en warempel, de noam van t nije fietspad is zulfs gewoon op zien Grunnegs: Brijsterloan!

n Aander veurbeeld liekt veul op t veurege. Vlakbij t dörp Middelsom [Middelstum] lijt t dörpke Doord [Toornwerd], tussen hoaken stijt ok hier de ‘Hollandse’ noam. Het nije fietspad tussen Kannes [Kantens] en Doord hiet doarom Doorderpad, ok gewoon op zien Grunnegs.

De Brijsterloan en t Doorderpad bennen nije Noord-Grunneger fietspadden en zo t liekt hemmen ze ien de gemeente Eemsmond t haart op t goeie plak.

Tonko Ufkes

(foto: Tonko Ufkes)

Tags:



Reacties zijn gesloten

Terug naar boven ↑
  • Activiteiten