Column Jan de Jong, column

Gepubliceerd op 19 februari 2016 | door Webloug

0

’t Verstaand’ column van Jan de Jong

t Verstaand

n Garelli wer t. Vief versnellens. Mien aldereerste plof. Hai kon rad. Wel zeuvennegenteg zag k nog
net dou n waarme zummeroavend boeten t dörp mie der n dikke mug ien oog knapte en k ien baarm over kop vloog. Ik hong aanderkaant sloot tegen waal. t Leutje stuurtje stak nog net boven t wotter oet.

Thoes zat k mien zunden ais te overdenken. Mazzel, ales dee t nog. Ook van plof.
Wat mekaaiert joe toch dat ie mit zo’n duvelse rötgang laangs s Heren wegen vlaigen willen.

Haard rieden. Ook op dag van vandoag lees k. Al gaait t nait over snelhaid van plof mor over dij van auto’s. Honderddatteg kilometer op grode weg. A 28.
Verschrikkelk slecht zegt verkeersdeskundege Hornman. t Levert niks op. n Test van Maastricht noar Den Helder mit honderddatteg op teller is elf menuten vlugger as mit honderdtwinneg. Maximoale
tiedwinst as ie zo bie pad en weg deur ons laand joagen.
‘n Begriepelk vervolg van n onbegriepelk belaaid.’

Mor woarom kin dat nò ien ainen wel?
Effecten van nomen milieumoatregeln. Welke, krieg ie gain antwoord op. Dat kinnen zai nait zo
persies even oetstukken. t Komt ter op deel dat ain kaant stikstofrieke grond ofgroaven wordt en
boeren heur mis stikstofaarm oetrieden mouten.
Din komt ter meer roemte veur economische grui, roupt t stokpeerdtje van VVD.

t Gaait om aanvlaigroutes vanoet t Noorden, Oosten en t Zuden noar Randstad dij sneller mouten.
Minister het gain bosschop aan jeuzeln en jammern over fienstof en geluudsoverlast.
En telt verkeersvaaileghaid en gezondhaid van mìns en noatuur nait mit?
Nee, zo is t ook weer nait zegt Riekswotterstoat. Wie hemmen t pergrammoa PAS, das n haile stoere rekenmethode. Doar kinnen wie din snelhaid mit omhoog gooien en, as t neudeg is milieumoatregeln trevven.

As zai gewoon boeren nò ais aanzeggen nog minder mis oet te rieden. Honderdviefteg?

k Heb dou mien Garelli n zetje loader votdoan. t Wer n Kreidler Florett. Ain mit zo’n tuutaai tank.
Hai wol nait zo rad. Viefenzeuventeg. Mor nò konden wichter mitvoaren. Ach, en om din wat laanger
onderwegens te weden von k hail nait slim.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

20 − 19 =

Terug naar boven ↑
  • Literatuur activiteiten

    Geen nieuwe activiteiten