Column Jan de Jong, column

Gepubliceerd op 8 juli 2016 | door Webloug

0

’t Is weer zo wied’ column van Jan de Jong

t Is weer zo wied

‘Bis gruid wicht?’
‘Nee! Beguns doe no ook al te soezen? k Heb haitied al zo’n dikke kont had.’

Groot maart ien Stad.

Ik kiek. n Schier wupgat. Ach, wat. Dik?
Wichter goan op n terraske zitten.
Ik heb ook wel zin ien kovvie.
Zai luzzen ook wel abbeltoart. ‘Mit slagroom. Joa.’
Ober laagt en schudt bus ais flink.

‘Man, hol op. Ik heb swoare spieren. Dou niks aans as gezond eten en heb wel al tien diëten
pebaaierd.’
‘Bis al ais bie dokter west? Is t dien schildklier nait?’
‘Nee. Dat kin mor zo ais weden. Al denk k eerder n aander klier. Mor wat k nait begriep, ik goa twij moal ien week oavends noar fitnesscentrum. Ik grui allinneg al van lucht.’

Aal joar n aarm verdrait heur k. Dij haarst en winter. Niks aans as duustere doagen.
En din dommee zummer.

Vraauwlu en heur lief.
t Zel aan mie liggen. Woarom toch aal dat gejeuzel over te dik weden?
As joe dat zo ien weeg zit… dou der din wat aan. Jammern helpt nait. Doar wordt gain mìnsk bliede
van. Ik zeker nait.

Of steuren ie joe nait aan dij joardoagen, feestdoagen, kerstdoagen, ol en nij en goa zo mor deur, dat ter weer ain is dij begunt mit: ‘Ikke nait hur, dou mie mor light. Aal dij calorieën. Waist wel houveul of doar wel nait ien zit?’
Nee, en dat wil k ook nait waiten.

Vanzulf, t is belangriek dat ie gezond leven en veul bewegen.
En ie worden dik van aal ‘doar ie gain handjes veur volden’ zee oma vrouger en schommelde ien heur spans klaid noar kaast en kreeg n trom mit slik of koekjes. Wie zollen t goud hebben.

Makkelk zegd, ik wait t.
Zaik weden, operoatsies, meedzienen en n toezeboudel tusken joen oren wil t wel ais stoer moaken.
Mor, loat joe niks aanproaten. t Is joen lief toch? Loat heur apmoal aan schieten lopen.

Wichter binnen der ais goud veur zitten goan. Der komt n glaske wien bie. Wordt laagt en proost.
Rooie wien, dat wel.

t Is al weer kloar gelukkeg.
Ik kiek op t allozie. Ach, ain kin wel. ‘Ober?’

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

5 × vier =

Terug naar boven ↑
  • Literatuur activiteiten

    Geen nieuwe activiteiten