Column column jan glas

Gepubliceerd op 10 april 2015 | door Webloug

0

’t Allerhoustergste’ column van Jan Glas

t Allerhoustergste

Ien feberwoarie 1958 ging der n maal virus rond ien Sofia, hoofdstad van Bulgarije. De Sofioten waren der slim verkoldens van. Hou ik dat wait? Nait deur t noapluzen van epidemie-overzichten, mor deur n live-optreden dat pianist Sviatoslav Richter gaf op 25 feberwoarie 1958 ien Sofia. Dat optreden is registeerd en op ploat zet, loader op cd en oetindelk op iTunes en dij versie heb ik download. Veur nait veul geld, opnoamekwaliteit is din ook nait zo best, mor Richter is briljant: ‘Pictures at an Exhibition’ van Mussorgsky. Man speult gedreven, mooi houkeg, sums kwoadachteg en din weer spannend iengeholden. Hai timmert der bie zetten flink op lös en doar mag ik wel over. Hai geft gain middle of the road-versie. Schubert, Chopin en Liszt kommen ook nog aan bod.

En nou din dat virus. Wat wil t geval, der wordt dus aan ain stuk deur houst tiedens dat optreden, t is de allerhoustergste live-registroatsie dij ik ken. Nait ain of twij Sofioten housten, nee, ze housten zowat apmoal. Sums housten van wel twij of drij “leddergrepen”. En gain haand veur mond, nee, voloet. Ien t begun steurde ik mie der slim aan, k heurde allinneg mor t housten. Onderhand kin ik mit gemak housten en muziek schaaiden.

Klassieke muziek en publieksgeluden is vanzulf n lastege combinoatsie. Je worden al gaauw bestravvend aankeken as je tiedens t concert ien n knisperpuut mit zuutjes omgraaien of n moal of wat housten. As dij oetvoeren din ook nog ais registreerd wordt en op n cd terechtkomt, binnen je veur altied dij anonieme bedaarver van kostboare momenten. Was din verdorie thoesbleven!

En din kom ik vanzulf terecht bie dat geweldege gedicht van Tonnus Oosterhoff: ‘Hoestte U zo bij dat concert?’ / ‘En van schaamte ben ik gestorven.’ / ‘De opname hebt u verkorven!’ / En van schaamte ben ik gestorven.’ / ‘De levende klanken van Schubert ‘ / de zwewevende vingers van Brendel / en U, dus. U, U…’. Rest van gedicht is hier te lezen. n Dail van de bewuste recital ien Sofia is hier te heuren. Op Youtube zet vanof n griesgedraaide lp. Deur de tikken en krazzen is t housten hoast nait meer te heuren. Mor ook hier zegeviert Richter, boven t gehoust en ook nog ais boven ale tikken en krazzen oet.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

7 + achttien =

Terug naar boven ↑
  • Literatuur activiteiten

    Geen nieuwe activiteiten