Column Jan de Jong, column

Gepubliceerd op 14 maart 2016 | door Webloug

0

‘Stroekelg’ column van Jan de Jong

Stroekelg

Ik loop deur n laange gaang noar roemte doar k wachten mout.
Oncologische revalidoatsie ien Beatrixoord. n Moal of wat ien week.

Bie n laange toavel zitten twij vraauwen en vaaier mannen.
‘Goeiemorgen.’
n Vraauw nikt verschrikt en n man bromt.
Ik krieg n stoul.

n Memènt, dat ie gewoonlek n klok doavernd tikken heuren.
Schane, t blift bie n ronde blikken dij mie ien stilswiegen aankikt.

Ain vraauw bloadert aalweg deur n glimmend blad en kikt nò en din eefkes over raand. Aan t ende
begunt zai vernijs. Aander vraauw wupt mit n bain. Zit ien n hail aander wereld zo t liekt.
Twij mannen hebben nije veters ien schounen.
Ain man kikt aal noar deuren ien gaang en aander het onrust ien t gat. Hou mout ie din kieken en woar loat ie joen handen.

‘Goe – de – mor – gen!’ n Jonk vraauwspersoon huppelt noar t apperoat veur wat drinkerij.

‘Is diëtiste,’ zegt man en legt handen op toavel.
‘Ja,’ heur k n buurman fluustern.

Ik kiek heur apmoal nog ais bielaangs. ‘Gezonde’ eters.
‘Ach, gewoon aal doag n stoetje minder en even goud kieken wat ie der op doun. En din binnen ie zo n
poar kilo kwiet toch?’

Hé, ik proat Grunnegs.
‘Ik krieg mie nog mor n bekertje sukkeloa ducht mie.’ Man pakt t lege bekertje. ‘Wel nog
meer?’
Vraauw legt t blad vot. ‘Ik loop wel eefkes mit.’
Ik huif nait. ‘k Heb laiver jannever.’
Kloar is t. Ik heur van ‘aal doag n poar borrels’, en ‘ joa, mit n vleske bier der bie’. En van ‘bezzen’ en
‘n avvekoatje’. ‘En wenneer kriegen ie nog boerenjonges bie ain.’

Ik denk even aan tekst van t gedicht op t baankje, stoef bie iengang.
Van Jan Boer.

Ons volk is brokkel.
Stroef en kold.
Net as zien haarde kloeten.
Mor t beste is noar binnen vold.
De roegste kaant zit boeten.

Wonsdag 2 meert 2016..
Wordt RTV Noord in de toekomst verplicht Groningstalig en moeten er op alle scholen lessen
Gronings komen? Wat vind jij? Wil je het Gronings als officiële voertaal of vind je dat onzin?

Ik wil het Gronings als voertaal (Poll gesloten)
Eens 50.48% (1,955 stemmen)
Oneens 49.52% (1,918 stemmen)
Totaal aantal stemmen: 3,873

Oere, wat n schrik.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

drie × drie =

Terug naar boven ↑
  • Literatuur activiteiten

    Geen nieuwe activiteiten