Column Jan Glas

Gepubliceerd op 24 oktober 2017 | door Webloug

0

‘Stroatmoakers hoeden ien Muurstroat’ column van Jan Glas

Stroatmoakers hoeden ien Muurstroat

As ik oet mien keukenroam hang en kop noar links draai, kiek ik liek Muurstroat ien. Hoeren hemmen doar sunt zowat twij joar hakken licht en nou wordt stroat vannijs bestaind. Stroat mot bliekboar zuverd worden van de stainen woar t hoerevòlk op hinneweer sjokt het. Mannen ien pakken mit felle rose-rode vlakken kroepen ien t zaand om. Mit heur vieven binnen ze. En aalgedureg is der n hond bie. t Is hond van fietsemoaker op houk van Nije Kiek Ien t Jatstroat. Hond ligt mainsttied boeten bie iengaang van waarkploats. t Is nait zomor n hond, t is n schoapendriever, n Border Collie. Ien n eeuwenlaange aanloop fokt om n kudde schoapen bie nkander te holden en op te drieven. n Hond mit n beroep. Zukke honden hemmen ien n stad vanzulf aalgedureg n onbestemde wènst. Faitelk binnen ze waarkloos. Hemmen ien zo’n stad niks om handen, hangen om. Ze binnen din voak ook wat onrusteg. Ze holden ook ien stad n drang om bewegende objecten bie nkander te holden. Meschain het dizze Border Collie wel nooit bie n kudde schoapen west, mor t hoeden zit hom wel ien de genen.

En din op n dag binnen der opains n stuk of wat stroatmoakers. Ze kroepen troag deur stroat, lopen hinneweer om wat te hoalen, mor blieven, aal bewegend, n groep. n Perfecte, klaaine kudde. Vanof dag ain runt Border Collie der aal omtou, volgt ain dij even votlopt en dwingt hom weer terug noar de kudde. Hail dag is e der mit ien de weer. Dit is woarveur e geboren is. Hond het waark.

k Heb voak n beetje te doun mit Border Collies zunder kudde. t Is ook n wat elitaire hond. Hond zulf nait vanzulf, mor de boaskes ogen voak wat snobistisch. Zo’n soort hond mot boaske verhevven boven t ordinaire vòlk mit heur doodgewone honden. As je nou n hokvol kiender mit ADHD hemmen, din zol zo’n hond nog op zien stee wezen. Schoapen of kiender, wat moakt t oet. Voak oetloaten en flink veul runnen loaten, is t onderhold van n Border Collie zunder kudde. Mor der gaait toch niks boven t echte waark.

Ik laip n moal ien n natuurgebied en rouk aan de proat mit n vraauw dij doar was mit n Husky. ’n Typische sledehond’ lees ik op Wikipedia, ‘as e waarken kin is e haildaal ien zien element.’ Aal dij tied dat wie aan t proaten waren zat hond stil veur hom oet te kieken. Hai sluig gain acht op mie. Ik wol hom eefkes aanhoalen. ‘Dou mor nait,’ zee vraauw, ‘doar geft e nait om, hai is nait richt op mìnsen.’ Hai wol ien n roedel wezen en n slee trekken. Doar zat e, stoef veur hom oet ien de verte te kieken. n Waarkhond mit wènst.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

twaalf + zes =

Terug naar boven ↑
  • Literatuur activiteiten

    Geen nieuwe activiteiten