Column Jan de Jong, column

Gepubliceerd op 4 januari 2017 | door Webloug

0

“Sterretjes” column van Jan de Jong

“Sterretjes”

n Kop en lief vol onrust.
nKander ien goaten holden. Ogen zuiken intied noar t inde van t duuster. Vouten op taast. Op patrouille. Wie lopen bie n baarghelgen deel.
Stilte draaigt.

Aal oavends kins ter op wachten.
n Laand, doar t al vroug, binnen vief menuten duuster wordt. En din begunt t gesodemieter.
Liefzere, t tellen noa n ofschot. Woar vaalt e. t Geluud van grenoaten. t Schaiten.
Helikopters dij licht streuen.

Oljoarsoavend.
Stilleghaid van n oorlog.
Vroagende ogen. Stilstoan. Aalweg vernijs.Wachten.
Luustern. Noar t soezen ien oren. n Bonkend haals. t Sloeken.
Tegen twaalm stoan wie stoef bie nkander. Kieken omhoog. Aal dij valende steerns.
Ain fluustert en kikt rond. ‘Hebben wie nog wensen?’
Ik kiek heur apmoal aan.
t Blift stil.

Om twaalf uur brekt hel lös. n Doavernd laand. Ales wat mor schaiten kin of wil schut ien lucht. Vief menuten. En wereld swigt vernijs.

Vandoag verwacht Leo Groeneveld van de Belangenvereniging Pyrotechniek Nederland dat der 68 miljoun euro besteed is “aan het kopen van rotjes en mooi vuurwerk”.
De branche komt “nu echt uit een dalletje”.
t “Dalletje” is weer veurbie.

t Zel nog wel wat doagen noadoavern.
Boudel zel op mouten. Aans is t ankommend joar slof.

En der was, volgens Leo Groeneveld, zo as altied “veel vraag naar het zogenaamde jeugdvuurwerk als sterretjes”.

Ik heb dizze oljoarsoavend n wens doan.

Bron: http://www.telegraaf.nl/binnenland/27343166/__Weer_meer_vuurwerk_verkocht__.html

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vier × vier =

Terug naar boven ↑
  • Literatuur activiteiten

    Geen nieuwe activiteiten